کشمیر: کولگام میں پولیس ٹیم پر دستی بم سے حملہ، پولیس اہلکار شہید

سری نگر: جموں و کشمیر میں ضلع کولگام کے کیموہ علاقے میں ملی ٹینٹوں کے دستی بم حملے میں ریاستی پولیس کا ایک جوان شہید ہو گیا۔ موصولہ اطلاعات کے مطابق ملی ٹینٹوں نے گزشتہ رات کیموہ علاقے میں ایک پولیس ٹیم پر دستی بم پھینکا جس میں جموں و کشمیر پولیس کا ایک اہلکار زخمی ہوا۔ اسے علاج کے لیے گورنمنٹ میڈیکل کالج (جی ایم سی) اسپتال اننت ناگ لے جایا گیا، جہاں علاج کے دوران اس کی جان چلی گئی۔

شہید فوجی کی شناخت طاہر خان کے طور پر ہوئی ہے جو پونچھ، جموں ڈویژن کے مینڈھر کا باشندہ تھا۔ پولیس نے ٹوئٹ کیا، ’’گزشتہ رات کیموہ کولگام میں ایک گرینیڈ حملے کی اطلاع ملی۔ دہشت گردی کے اس واقعہ میں پونچھ کے مینڈھر کا رہنے والا طاہر خان نامی پولیس اہلکار زخمی ہوا۔ اسے علاج کے لیے جی ایم سی اسپتال اننت ناگ لے جایا گیا، جہاں اس نے دم توڑ دیا اور جام شہادت نوش کیا۔‘‘