کشمیر: کورونا میں مبتلا مزید چار افراد کی موت

سری نگر: وادی کشمیر میں مختلف اضلاع سے تعلق رکھنے والے چار کورونا متاثرین کی موت واقع ہونے کے ساتھ جموں و کشمیر میں اب تک اس وائرس سے انتقال کرنے والوں کی تعداد بڑھ کر 111 ہوگئی ہے۔ بتادیں کہ وادی میں شیر کشمیر انسٹی ٹیوٹ آف میڈیکل سائنسز صورہ سری نگر اور شری مہاراجہ ہری سنگھ اسپتال سری نگر میں جمعرات کے روز دو دو مریضوں کی موت واقع ہوئی۔

ایس ایم ایچ ایس اسپتال کے میڈیکل سپرنٹنڈنٹ ڈاکٹر نذیر چوہدری نے ایک مقامی خبر رساں ایجنسی کو بتایا کہ ضلع سری نگر کے بٹہ مالو علاقے سے تعلق رکھنے والی 65 سالہ خاتون مریض اور ضلع بڈگام سے تعلق رکھنے والے 75 سالہ مریض جن کا کورونا ٹیسٹ جمعرات کو مثبت آیا، کی موت گزشتہ روز واقع ہوئی تھی۔

انہوں نے کہا کہ دونوں مریض نمونیا اور ہائپر ٹینشن کے علاوہ دیگر کئی عارضوں میں مبتلا تھے۔ انہوں نے کہا کہ دونوں کو بدھ کے روز یہاں داخل کیا گیا تھا۔ قبل ازیں جنوبی کشمیر کے ضلع کولگام اور شمالی کشمیر کے ضلع بارہمولہ سے تعلق رکھنے والے دو مریضوں کی شیر کشمیر انسٹی ٹیوٹ آف میڈیکل سائنسز صورہ سری نگر میں موت واقع ہوئی تھی۔

سکمز کے میڈیکل سپرنٹنڈنٹ ڈاکٹر فاروق جان نے ان اموات کی تصدیق کرتے ہوئے کہا کہ کولگام کے یاری پورہ علاقے سے تعلق رکھنے والے 55 سالہ کورونا متاثرہ مریض کو یہاں 22 جون کو لایا گیا تھا اور جمعرات کے روز دن کے قریب سوا بارہ بجے اس کی موت واقع ہوئی۔ انہوں نے کہا کہ متوفی ہائپر ٹینشن کے علاوہ بھی کئی عارضوں میں مبتلا تھا۔ موصوف ڈاکٹر نے کہا کہ بارہمولہ سے تعلق رکھنے والے 65 سالہ مریض کو یہاں دس روز قبل لایا گیا تھا اور جمعرات کو اس کی یہاں حرکت قلب بند ہونے سے موت واقع ہوئی۔ انہوں نے کہا کہ متوفی بھی ہائپر ٹینشن اور دوسرے عارضوں میں مبتلا تھا۔

ان چار اموات کے ساتھ جموں و کشمیر میں کورونا سے متعلق اموات کی مجموعی تعداد 111 ہوگئی ہے جن میں سے 98 کا تعلق وادی کشمیر سے ہے جبکہ 13 صوبہ جموں سے تعلق رکھتے ہیں۔ وادی کشمیر میں ضلع سری نگر میں اب تک کورونا سے متعلق سب سے زیادہ 26 اموات درج ہوئی ہیں اور دوسرے نمبر پر ضلع بارہمولہ ہے جہاں اب تک 18 افراد کی اس وائرس میں مبتلا ہو کر موت واقع ہوئی ہے۔ ضلع کولگام میں 14، شوپیاں میں 12، اننت ناگ میں 9، بڈگام میں8 ، کپوارہ میں 6، پلوامہ میں 4 اور بانڈی پورہ میں ایک مریض کورونا میں مبتلا ہوکر داعی اجل کو لبیک کہہ گیا ہے۔