کرناٹک: سدارمیا کانگریس قانون ساز پارٹی کے لیڈر منتخب، گورنر سے ملاقات کر حکومت سازی کا دعویٰ کیا پیش

کرناٹک کے نامزد وزیر اعلیٰ سدارمیا کو آج کانگریس قانون ساز پارٹی (سی ایل پی) کا باضابطہ لیڈر منتخب کر لیا گیا۔ جمعرات کی شام سدارمیا اور ڈی کے شیوکمار دہلی سے بنگلورو پہنچے تھے جس کے بعد کانگریس قانون ساز پارٹی کی میٹنگ ہوئی۔ سی ایل پی لیڈر منتخب ہونے کے بعد سدارمیا نے بلاتاخیر گورنر سے ملاقات کر حکومت سازی کا دعویٰ پیش کر دیا۔

قابل ذکر ہے کہ سدارمیا کو کانگریس قانون ساز پارٹی کا لیڈر منتخب کیے جانے کی تجویز ڈی کے شیوکمار نے پیش کی۔ اس تجویز کو صورتی ووٹوں سے منظوری مل گئی۔ اس سے قبل کانگریس نے کئی دنوں تک ہوئے غور و خوض کے بعد سدارمیا کو وزیر اعلیٰ اور ڈی کے شیوکمار کو نائب وزیر اعلیٰ بنانے کا اعلان کیا۔

واضح رہے کہ نئی کرناٹک حکومت کی حلف برداری تقریب 20 مئی کو بنگلورو میں منعقد ہوگی۔ اس دن سدارمیا اور ڈی کے شیوکمار کے ساتھ کئی کچھ وزرا بھی حلف لے سکتے ہیں۔ اسی حلف برداری تقریب میں شرکت کے لیے یکساں نظریہ رکھنے والی پارٹیوں کے سرکردہ لیڈران کو مدعو کیا گیا ہے۔

اس سے قبل کانگریس صدر ملکارجن کھڑگے نے جمعرات کو کہا کہ پارٹی کرناٹک کی ترقی کے لیے پرعزم ہے اور ریاست کے 6.5 کروڑ لوگوں سے کیے گئے وعدے کے طمابق ریاست میں پانچ گارنٹی کو نافذ کرے گی۔ ٹوئٹر پر کیے گئے اپنے ایک پوسٹ میں کھڑگے نے لکھا کہ ’’ٹیم کانگریس کرناٹک کے لوگوں کے لیے ترقی، فلاح اور سماجی انصاف کو لے کر پرعزم ہے۔ ہم 6.5 کروڑ کنڑ لوگوں سے وعدہ کردہ 5 گارنٹی کو نافذ کریں گے۔‘‘ ملکارجن کھڑگے نے کرناٹک کے وزیر اعلیٰ عہدہ کے امیدوار سدارمیا اور نائب وزیر اعلیٰ عہدہ کے امیدوار ڈی کے شیوکمار کے ساتھ اپنی ایک تصویر بھی ٹوئٹ کی۔