کرناٹک کانگریس کے کارگزار صدر دھرو نارائن کا دل کا دورہ پڑنے سے انتقال

میسور: کرناٹک کانگریس کے کارگزار صدر، سابق رکن پارلیمنٹ اور سینئر دلت لیڈر آر دھرو نارائن کا ہفتہ کو میسور میں ان کی رہائش گاہ پر انتقال ہو گیا۔ ان کی عمر 61 برس تھی۔ خاندانی ذرائع کے مطابق دھرو نرائن کو صبح 6.30 بجے دل کا دورہ پڑا اور وہ اپنے ڈرائیور کے ساتھ اسپتال کے لیے روانہ ہوئے۔ تاہم، راستے میں ان کی حالت انتہائی نازک ہو گئی اور اسپتال پہنچنے پر انہیں مردہ قرار دے دیا گیا۔

دھرو نارائن نے 1983 میں کانگریس میں شمولیت اختیار کی تھی اور 1986 میں این ایس یو آئی کی بنگلورو یونٹ کے صدر کے طور پر خدمات انجام دیں۔ انہوں نے دو بار چامراج نگر پارلیمانی حلقہ کی نمائندگی کی۔ انہوں نے کولیگل اور سانتے مرالی حلقوں سے بھی کانگریس رکن اسمبلی کی حیثیت سے کامیابی حاصل کی۔

کانگریس کے اندرونی ذرائع نے بتایا کہ وہ آئندہ اسمبلی انتخابات میں ننجن گوڑ کے ریزرو حلقہ سے انتخاب لڑنے کی تیاری کر رہے تھے۔ ان کے احترام کے طور پر کانگریس نے رام نگر اور داونگیرے اضلاع میں ’پرجا دھوانی یاترا‘ کو منسوخ کر دیا ہے۔ کے پی سی سی کے کارگزار صدر ستیش جارکی ہولی نے اپنے ساتھی کے انتقال پر تعزیت کا اظہار کیا ہے۔

دھرو نارائن کے انتقال پر وزیر اعلیٰ بسواراج بومئی نے بھی تعزیت کا اظہار کیا ہے۔ انہوں نے کہا کہ وہ دھرو نرائن کے انتقال سے غمزدہ ہیں اور دعا کرتے ہیں کہ ان کی روح کو سکون حاصل ہو۔ میں دکھ کی اس گھڑی میں ان کے اہل خانہ اور حامیوں کے لیے قوت برداشت کی دعا کرتا ہوں۔