کانپور: ہسٹری شیٹر وکاس دوبے کے دو ساتھی رنبیر اور پربھات پولیس تصادم میں ہلاک

کانپور: اترپردیش میں کانپور کے پنکی علاقے میں پولیس نے جمعرات کے روز شاطر ہسٹری شیٹر وکاس دوبے کو پناہ دینے والے شخص کو ایک جھڑپ میں ہلاک کر دیا۔ پربھات مشرا کو فرید آباد کے ہوٹل سے گرفتار کیا گیا تھا۔ اس کے علاوہ وکاس دوبے کے ایک دوسرے ساتھی اٹاوہ کے رنبیر شکلا کو بھی پولیس نے ہلاک کر دیا۔ بتایا جاتا ہے کہ رنبیر شکلا شاہراہ پر گاڑی لوٹ کی واردات کو انجام دے رہا تھا۔ پولیس اطلاع ملنے کے ساتھ ہی موقع پر پہنچی اور جھڑپ کے دوران رنبیر مارا گیا۔

خیال رہے کہ جمعہ کی صبح مدھیہ پردیش کے اجین سے گرفتار کر لیا گیا ہے۔ وکاس دوبے اجین میں واقع مہاکال مندر چھپا ہوا تھا اور وہاں کے محافظوں کی اطلاع پر اسے ایم پی پولیس نے گرفتار کر لیا۔

انسپکٹر جنرل پولیس موہت اگروال نے بتایا کہ فرید آباد کرائم برانچ نے منگل کے روز وکاس کے ساتھی پربھات مشرا کو گرفتار کیا تھا۔ اسے وہاں کی عدالت میں پیش کرنے کے بعد پولیس اسے ٹرانزٹ ریمانڈ پر کانپور لا رہی تھی۔ ایس ٹی ایف کی ٹیم اسکارٹ کر رہی تھی کہ پنکی علاقے میں کانپور بھونتی شاہراہ پر گاڑی کا ایک ٹائر پنکچر ہو گیا۔

انہوں نے بتایا کہ پولیس اہلکار پنکچر ٹائر تبدیل کر رہے تھے کہ اس دوران موقع کا فائدہ اٹھا کر ملزم پربھات نے پولیس کی پستول چھین کر فرار ہونے کی کوشش کی اور پولیس ٹیم پر فائرنگ کرنی شروع کردی۔ جوابی فائرنگ میں پربھات گولی لگنے سے شدید زخمی ہو گیا۔ اسے فوری طور پر اسپتال پہنچایا گیا جہاں ڈاکٹروں نے اسے مردہ قرار دے دیا۔

موہت اگروال نے بتایا کہ پربھات کی فائرنگ سے ایس ٹی ایف کے دو کانسٹیبل بھی شدید زخمی ہوئے ہیں۔ واضح رہے کہ فرید آباد پولیس نے فرید آباد میں ایک گیسٹ ہاؤس سے پربھات سمیت تین افراد کو گرفتار کیا تھا۔

ادھر، وکاس دوبے کا دوسرا ساتھی رنبیر شکلا دیر رات گئے مہوبہ کے پاس شاہراہ پر سوئفٹ ڈیزائر گاڑی لوٹنے کی واردات انجام دے رہا تھا۔ جیسے ہی پولیس موقع پر پہنچی تو فائرنگ شروع ہو گئی۔ اس فائرنگ میں رنبیر شکلا کو ڈھیر کر دیا گیا، تاہم اس کے تین ساتھی فرار ہونے میں کامیاب رہے۔ اٹاوہ پولیس نے ملحقہ اضلاع میں الرٹ جاری کر دیا ہے۔ رنبیر شکلا کے سر پر پولیس نے 50 ہزار کا انعام رکھا تھا اور وہ بھی کانپور سانحہ کا ایک ملزم تھا۔

وکاس دوبے مدھیہ پردیش کے اجین سے گرفتار

اتر پردیش کے بدنام زمانہ گینگسٹر وکاس دوبے کو مدھیہ پردیش کے اُجین سے گرفتار کیا گیا۔ پولیس کے ایک سینئر افسر نے اس کی تصدیق کرتے ہوئے کہا کہ دوبے کو یہاں مہاکال پولیس چوکی علاقہ سے گرفتار کیا گیا۔ مدھیہ پردیش پولیس نے اسے اپنی گرفت میں لے کر سکیورٹی کے سخت انتظامات کئے ہیں۔

کچھ دن قبل اتر پردیش میں پولیس کے آٹھ اہلکاروں کے قتل کے بعد سے وہ فرار تھا اور اتر پردیش پولیس اس کی جگہ جگہ تلاش کر رہی تھی۔ مدھیہ پردیش کے وزیر داخلہ ڈاکٹر نروتم مشرا نے بھی وکاس دوبے کی گرفتاری کی تصدیق کی ہے۔