گینگسٹر وکاس دوبے کے 'ساتھی' کے مکان میں رہنے والے تین پولس اہلکار معطل

کانپور شوٹ آؤٹ کے اہم ملزم گینگسٹر وکاس دوبے کے انکاؤنٹر میں مارے جانے کے بعد لگاتار یو پی پولس یہ دعویٰ کرتی آ رہی ہے کہ اب وہ وکاس کے ساتھیوں پر شکنجہ کس رہی ہے۔ اس معاملے میں شروع سے خود پولس بھی سوالوں کے گھیرے میں رہی ہے۔ اب اس معاملے میں تین پولس اہلکاروں کو اس لیے معطل کر دیا گیا ہے کیونکہ ان کے اوپر الزام ہے کہ وہ وکاس کے ساتھی جے واجپئی کے کانپور واقع برہم نگر علاقہ میں موجود متنازعہ مکان میں رہ رہے تھے۔ ایسے میں آئی جی نے تینوں پولس اہلکاروں کو معطل کر دیا ہے۔

خبروں کے مطابق ڈپٹی انسپکٹر راج کمار (تھانہ کرنل گنج)، ڈپٹی انسپکٹر عثمان علی (تھانہ انور گنج) اور ڈپٹی انسپکٹر خالد (تھانہ رائے پوروا) جے واجپئی کے مکان میں رہ رہے تھے۔ اس بات کا انکشاف تب ہوا جب نظیر آباد کے سی او نے چھاپہ ماری کی۔ اس کے بعد تینوں پولس اہلکاروں پر کارروائی کی گئی۔ اس بات سے لوگ حیران ہیں کہ اتنا سب کچھ سامنے آنے کے بعد بھی تینوں پولس اہلکار وکاس کے ساتھی کے مکان میں آخر کس طرح رہ رہے تھے۔

اس کیس میں پولس کا دعویٰ ہے کہ وہ لگاتار وکاس کے ساتھیوں پر شکنجہ کس رہی ہے۔ 11 اگست کو یو پی ایس ٹی ایف نے 50 ہزار کے انعامی بال گووند دوبے عرف لالو کو چترکوٹ سے گرفتار کیا۔ پولس اب تک اس معاملے میں اہم ملزم وکاس دوبے سمیت 6 ملزمین کا انکاؤنٹر کر چکی ہے۔ اس معاملے میں اب تک 18 ملزمین کو گرفتار کر جیل بھیجا جا چکا ہے۔ گینگسٹر وکاس دوبے کا بھائی دیپک دوبے، راجہ رام، شیو تیواری، وشنو پال یادو عرف ضلع دار، رامو واجپئی، گوپال سینی، ہیرو دوبے، شیوم دوبے اب بھی فرار ہیں۔ سبھی پر 25-25 ہزار روپے کا انعام رکھا جا چکا ہے۔

اس کے علاوہ پولس نے 11 ملزمین کے خلاف غیر ضمانتی وارنٹ جاری کر رکھی ہے۔ اس سے پہلے کانپور شوٹ آؤٹ میں نامزد اوما کانت شکلا نے چوبے پور تھانہ میں ڈرامائی انداز میں خودسپردگی کی تھی۔ وہ اپنی فیملی کے ساتھ تھانہ پہنچا تھا اور گلے میں تختی لٹکائی تھی جس میں خود کے وکاس دوبے کا ساتھی ہونے اور کانپور انکاؤنٹر کے بعد پچھتاوے کی بات لکھی تھی۔