کنہیا کمار کی دہلی کے وزیر اعلی اروند کیجریوال سے ملاقات، انڈیا اتحاد کی مستقبل کی حکمت عملی پر تبادلہ خیال

نئی دہلی: شمال مشرقی دہلی پارلیمانی حلقہ سے انڈیا اتحاد کے امیدوار ڈاکٹر کنہیا کمار نے اتوار کے روز انتخابی مہم کے سلسلہ میں دیر شام دہلی کے وزیر اعلی اروند کیجریوال سے ملاقات کی۔ اس دوران دونوں کے درمیان انڈیا اتحاد کی مستقبل کی حکمت عملی پر تبادلہ خیال ہوا۔

ملاقات کے دوران دہلی کے وزیر اعلیٰ اروند کیجریوال نے کہا کہ اس بار انڈیا اتحاد بی جے پی حکومت کو منہ توڑ جواب دے گا۔ جبکہ ڈاکٹر کنہیا کمار نے کہا کہ ظلم کے خلاف سچ اور جدوجہد کی ہمیشہ جیت ہوتی ہے۔ اس بار ملک کے عوام انڈیا اتحاد کی پوری حمایت کر رہے ہیں۔ انہوں نے کہا کہ حق کا ساتھ دینے والے لوگ بھی جان چکے ہیں کہ مذہب اور نفرت کی بجائے انصاف کرنے والوں کو فتح حاصل ہوتی ہے۔

وزیر اعلیٰ کیجریوال سے ملاقات کے بعد کنہیا کمار نے اپنے بیان میں کہا کہ جدوجہد کرنے والے جیل جانے سے نہیں ڈرتے۔ مرکزی حکومت آپ کو دبانے میں کتنی طاقت جھونک دے لیکن ہم حق کے راستے پر ڈٹے رہیں گے۔

انہوں نے کہا کہ وزیرِ اعلیٰ اروند کیجریوال کی گرفتاری سے لوگ سجھ چکے ہیں کہ جو کام اور ترقی کی بات کرے گا اس کو پریشان کیا جائے گا، اس لیے دہلی کے عوام ’جیل کا جواب ووٹ سے‘ دینے کو بیتاب ہیں۔ تاہم ہم مل کر بی جے پی کا تختہ الٹ کر ملک میں انصاف کی حکومت قائم کرنے جا رہے ہیں۔

ڈاکٹر کنہیا کمار نے اپنی انتخابی مہم کے تحت براری کے تمام ساتھیوں کا تہہ دل سے شکریہ ادا کیا کہ اور کہا کہ عوام کی یہی محبت اور اعتماد خواتین کے حقوق کے لیے لڑی جانے والی لڑائی کو تقویت دے گا۔ جب بڑے تاجروں کے 16 لاکھ کروڑ روپے کے قرضے معاف کیے جا سکتے ہیں تو طلبہ کے قرضے بھی معاف کر دیئے جانے چاہئیں۔ اگر انڈیا اتحاد کی حکومت بنتی ہے تو ہم یہ کر کے دکھائیں گے۔