لکھنؤ: کلیم اللہ کے آم کی نئی قسم ڈاکٹروں کے نام منسوب

لکھنؤ: اترپردیش کی راجدھانی لکھنؤ کے ملیح آباد علاقے میں آم کے ایک درخت پر سینکڑوں قسم کے آم اگانے والے پدم شری کلیم اللہ نے اس مرتبہ بھی نئے قسم کا آم اُگایا ہے اور اسے ڈاکٹر نام دیا ہے۔ کلیم اللہ کہتے ہیں کہ یہ نئی قسم ان ڈاکٹروں کے نام منسوب ہے جو کرونا جیسی وبا میں خود اپنی جان اور اپنے اہل خانہ کی فکر کیے بغیر لوگوں کی زندگیوں کو بچانے میں لگے ہوئے ہیں۔ انہیں افسوس ہوتا ہے جب لوگوں کی جان بچانے میں لگے ان ڈاکٹروں پر جان لیوا حملے ہوتے ہیں۔

بزرگ کلیم اللہ کا کہنا ہے کہ انہیں خوشی ہوگی کہ اگر ڈاکٹر ان کے آم کے باغ میں آکر اس کا لطف لیں۔ وہ ہر سال آم کی کوئی نہ کوئی قسم اگاتے ہیں اور اسے نیا نام دیتے ہیں۔ آم کے درخت پر امیتابھ، ابھیشیک اور ایشوریہ آم ابھی تک پیدا ہوتے ہیں۔

اس کے علاوہ کلیم اللہ اکھلیش، ملائم، اعظم کے علاوہ اے پی جے عبدالکلام کے نام سے بھی آم کی نئی قسم اگا چکے ہیں۔ وزیراعظم نریندر مودی کے نام سے بھی وہ آم کی نئی قسم اگا چکے ہیں۔ وہ ہر سال اپنے باغ میں لوگوں کو آم کی دعوت دیتے ہیں۔ اس مرتبہ ان کی خواہش ڈاکٹروں کو مدعو کرنے کی ہے۔

انہوں نے بتایا کہ اگر آنے والے دنوں میں سب کچھ معمول کے مطابق رہا تو ڈاکٹروں کو بلا کر انہیں خوشی ہوگی۔ ہر سال آم کی نئی قسم اگانے کی وجہ سے سابق وزیراعظم اٹل بہاری واجپئی کی معیاد کار میں انہیں پدم شری کے اعزاز سے سرفراز کیا گیا تھا۔