بیٹے کی غنڈہ گردی پر وجے ورگیہ نے کھویا آپا، ٹی وی اینکر سے پوچھی اس کی اوقات

کل ٹی وی چینل کے اینکر کے ساتھ جو کچھ ہوا اس کو بی جے پی کے رہنماؤں کا اقتدار کا نشہ نہیں کہیں گے تو اور کیا کہیں گے۔ اندور سے رکن اسمبلی اور بی جے پی کے جنرل سکریٹری کیلاش وجے ورگیہ کے بیٹے آکاش وجے ورگیہ نے کل کھلے عام میونسپل کارپوریشن کے افسر کی کرکٹ کے بلے سے پٹائی کی، جس کے بعد عدالت نے نے ان کو 11 جولائی تک کے لئے جیل بھیج دیا، لیکن اس پر جب کیلاش وجے ورگیہ سے ایک ٹی وی اینکر نے سوال کیا تو وہ اس قدر بھڑک گئے کہ انہوں نے سوال پوچھنے والے اینکر سے اس کی حیثیت اور اوقات پوچھ ڈالی۔ کیلاش وجے ورگیہ کی یہ بھڑکنے والی ویڈیو وائرل ہو گئی۔

واضح رہے کارپوریش کی ایک ٹیم کل ایک ایسے مکان کو گرانے کے لئے گئی تھی جس کی حالت بہت خستہ تھی۔ آکاش وجے ورگیہ کو یہ نشہ تھا کہ وہ کیلاش وجے ورگیہ کے بیٹے ہیں اس لئے انہوں نے بجائے قانونی کارروائی کرنے کے خود قانون اپنے ہاتھ میں لے لیا اور سرکاری افسر کی پٹائی کر دی۔

ادھر کارپوریش کے بلڈنگ انسپیکٹر دھیریندر بیاس نے جو شکایت درج کی ہے اس کے مطابق جب وہ اپنی ٹیم کے ساتھ مخدوش مکان گرانے کے لئے علاقہ میں پہنچے تو بی جے پی کے رکن اسمبلی آکاش وجے ورگیہ نے موقع پر پہنچ کر ان کو دھمکایا اور سر عام کرکٹ کے بلے سے پٹائی کی۔ واضح رہے کہ اس واقعہ کا ویڈیو وائرل ہو گیا۔ دوسری جانب اس مکان میں رہنے والی خاتون نے پولس میں شکایت درج کرائی ہے کہ کارپوریش کے افسران زبردستی اس کے مکان میں گھس گئے اور اس کے ساتھ بد تمیزی کی۔

اس واقعہ پر جب ایک ٹی وی اینکر نے کیلاش وجے ورگیہ سے فون پر ان کے بیٹے کی غنڈہ گردی کو لے کر سوال کیا اور کہا کہ آپ کو اس واقعہ کی مذمت کرنی چاہیے تو کیلاش وجے ورگیہ بھڑک گئے اور کہا ’’آپ جج ہیں کیا؟ آپ ایسے فیصلہ نہیں دے سکتے، ہو آر یو؟ کیا ہے آپ کی حیثیت؟ آپ فیصلہ کریں گے کسی رکن اسمبلی کے بارے میں؟اپنی اوقات دیکھیے پہلے؟‘‘ یہ کہہ کر انہوں نے اینکر کا فون کاٹ دیا۔

اس ویڈیو کے وائرل ہونے کے بعد سوشل میڈیا پر کیلاش وجے ورگیہ کی تنقید ہو رہی ہے اور بی جے پی کی قیادت سے سوال کیے جا رہے ہیں۔ کچھ نے تو یہاں تک لکھا ہے کہ یہ اقتدار کے نشہ میں چور ہیں اور دونوں باپ بیٹوں کوپارٹی سے باہر نکال دینا چاہیے۔