بی جے پی-آر ایس ایس میرا بھی قتل کروا سکتی ہے: جگنیش

وی ایچ پی لیڈر پروین توگڑیا کے انکاؤنٹر والے بیان کے بعد دلت لیڈر اور گجرات کے وڈگام سے ممبر اسمبلی جگنیش میوانی نے بھی اپنی جان کو بی جے پی اور آر ایس ایس سے خطرہ بتایا ہے۔ ان کا کہنا ہے کہ بی جے پی اور آر ایس ایس والے انھیں راستہ سے ہٹانا چاہتے ہیں اور اس کے لیے وہ کچھ بھی کر سکتے ہیں۔ جگنیش نے ایک انگریزی اخبار سے بات چیت کے دوران اپنے اس ڈر کا اظہار کیا۔ انھوں نے کہا کہ ’’میرے من میں بھی وی ایچ پی لیڈر پروین توگڑیا کی طرح ڈر ہےکہ کچھ لوگ میرا قتل کر واسکتے ہیں۔ بی جے پی اور آر ایس ایس کے لوگ مجھے مروا سکتے ہیں۔ مجھے ذرائع کے حوالے سے معلوم ہوا ہے کہ وہ لوگ مجھے راستہ سے ہٹانا چاہتے ہیں۔‘‘

قابل غور بات یہ ہے کہ جگنیش کے حامی کافی وقت سے ان کے لیے ’وائی‘ کیٹگری کی سیکورٹی مہیا کرانے کا مطالبہ انتظامیہ سے کرتے رہے ہیں لیکن ابھی تک ان کا مطالبہ پورا نہیں ہوا ہے۔ اس کیٹگری میں شامل شخص کے ارد گرد 11 سیکورٹی گارڈ ہوتے ہیں جن میں آٹھ کمانڈو رہتے ہیں۔ راشٹریہ دلت ادھیکار منچ نے اس سلسلے میں بتایا کہ میوانی کو سیکورٹی مہیا کرنے کے مطالبہ پر تنظیم کی جانب سے مہسانا، جام نگر، کچھ، کھیڑا، رادھن پور، اونجھا، وَڈ نگر، بھاؤ نگر اور بوٹاد میں انتظامیہ کو 30 درخواستیں دی گئی ہیں۔

اب جب کہ جگنیش میوانی نے خود اپنے خلاف قتل کی سازش تیار کیے جانے کا اندیشہ ظاہر کر دیا ہے تو ان کے حامیوں میں بھی پریشانی دیکھنے کو مل رہی ہے۔ راشٹریہ دلت ادھیکار منچ سے متعلق کارکنان زبانی طور پر ان کی سیکورٹی سخت کرنے کا مطالبہ ایک بار پھر کرنے لگے ہیں۔ ساتھ ہی سیاسی گلیاروں میں بی جے پی اور آر ایس ایس کے خلاف یہ سوال بھی اٹھنے لگے ہیں کہ کیا وہ اپنے مخالفین کو راستہ سے ہٹانے کے لیے قتل کرانے میں یقین رکھتی ہے؟ اور یہ بھی کہ کیا ہرین پانڈیا اور سنجے جوشی کی جو حالت ہوئی اس میں بی جے پی کا ہی ہاتھ تھا؟