’جھارکھنڈ میں یو سی سی اور این آر سی نافذ نہیں ہوگا‘، ہیمنت سورین کا امت شاہ کو جواب

جھارکھنڈ اسمبلی انتخاب کے لئے سیاسی پارٹیوں کی طرف سے انتخابی مہم پورے زور و شور سے جا ری ہے۔ سیاسی لیڈران کے درمیان زبانی جنگ بھی شروع ہو چکے ہیں۔ اسی ضمن میں جھارکھنڈ کے وزیر اعلیٰ ہیمنت سورین نے مرکزی وزیر داخلہ امت شاہ پر سخت حملہ بولا ہے۔ ہیمنت سورین نے کھلے لفظوں میں کہا کہ جھارکھنڈ میں یو سی سی اور این آر سی نہیں نافذ نہیں ہوگا۔ انہوں نے کہا کہ ’’معاشرہ کو توڑنے کی سوچ رکھنے والی بی جے پی کی دال گلنے نہیں دی جائے گی۔ جھارکھنڈ میں صرف سی این ٹی/ایس پی ٹی/پی ای ایس اے چلے گا کوئی یو سی سی اور این آر سی نہیں چلے گا۔‘‘

ہیمنت سورین نے اپنے خطاب میں کہا کہ ’’یہ کبھی این آر سی تو کبھی یو سی سی لگانے کی بات کرتے ہیں۔ ہم نے بھی کہہ دیا ہے یہاں یو سی سی اور این آر سی کی کوئی بات نہیں ہوگی۔ یہاں صرف بات ہو گی تو ’چھوٹا ناگپور کاشت کاری‘ (سی این ٹی)، ’سنتھال پرگنہ کاشت کاری‘ (ایس پی ٹی) یا پی ای ایس اے (شیڈولڈ علاقوں میں پنچایتوں کی توسیع) قانون کی بات ہو گی۔ کیسے ملک کو توڑو، کیسے ملک اور سماج کو بانٹو۔ ان کا یہی کام رہتا ہے۔ یہ لوگ زہر اگل رہے ہیں اور انہیں آدیواسیوں، مقامی باشندوں، دلتوں یا پسماندہ برادریوں کی کوئی پرواہ نہیں ہے۔‘‘ ساتھ ہی انہوں نے بی جی پی کی تشبیہ ’سوکھے ہوئے درخت‘ سے کی، اور اسے جڑ سے اکھاڑ پھینکنے کا عہد کیا۔ انہوں نے یہ بھی کہا کہ بی جی پی کا مقصد ہے معدنی دولت کے لئے مقامی باشندوں کو بے گھر کرنا۔

قابل ذکر ہے کہ وزیر داخلہ امت شاہ نے بی جے پی کے انتخابی منشور کے اجراء کے وقت سورین حکومت کو تنقید کا نشانہ بنایا تھا۔ انہوں نے کہا کہ ’’ہماری حکومت جھارکھنڈ میں یو سی سی نافذ کرے گی، لیکن آدیواسیوں کو اس سے باہر رکھا جائے گا۔ ہیمنت سورین اور جھارکھنڈ مکتی مورچہ (جے ایم ایم) کی حکومت یہ پروپیگنڈہ پھیلا رہی ہے کہ یکساں سول کوڈ آدیواسی حقوق، ثقافت اور اس سے متعلق قانون کو متاثر کرے گی۔‘‘