جھارکھنڈ: گینگسٹروں کی ضمانت نامنظور کرنے والے جج کا آٹو سے ٹکر مار کر قتل! ہائی کورٹ کا از خود نوٹس

دھنباد: جھارکھنڈ کے دھنباد شہر میں ایڈیشنل ڈسٹرکٹ جج (اے ڈی جے) اتم آنند کو مارننگ واک کے دوران ایک آٹو نے پیچھے سے ٹکر مار دی، جس سے ان کی موت ہو گئی۔ پہلے اس معاملہ کو ’ہٹ اینڈ رن‘ کے طور پر لیا گیا تھا لیکن اب جبکہ واقعہ کی سی سی ٹی وی فوٹیج منظر عام پر آ چکی ہے تو ظاہر ہو رہا ہے کہ واردات کو سازش کے طور پر انجام دیا گیا ہے۔

اس معاملہ میں پولیس نے قتل کی دفعات میں مقدمہ درج کر لیا ہے، جبکہ سپریم کورٹ بار ایسوسی ایشن نے معاملہ کی سی بی آئی جانچ کرانے کا مطالبہ کیا ہے۔ وہیں، جھارکھنڈ ہائی کورٹ نے اس معاملہ میں از خود نوٹس لے لیا ہے۔

خیال رہے کہ دھنباد کے اے ڈی جے اتم آنند بدھ کی صبح سیر پر نکلے تھے، تبھی پیچھے سے ایک آٹو نے دانستہ طور پر انہیں ٹکر مار دی، جس سے وہ لہولہان ہو کر گر پڑے۔ بعد میں انہیں شہید نرمل مہتو میڈیکل کالج اسپتال میں علاج کے لئے داخل کرایا گیا لیکن وہ زخموں کی تاب نہ لاکر دم توڑ بیٹھے۔

واقعہ کی سی سی ٹی وی فوٹیج میں نظر آ رہا ہے کہ اتم آنند صبح کی سیر کے دوران سڑک کے کنارے پر جاگنگ کر رہے ہیں۔ تبھی ایک آٹو جو کہ سڑک کے بیچ میں چل رہا تھا اچانک اس کا رخ اے ڈی جے کی جانب ہو جاتا ہے۔ آٹو ڈرائیور اچانک سے اتم آنند کو پیچھے سے ٹکر مارتا ہے اور موقع سے فرار ہو جاتا ہے۔

پولیس نے انکشاف کیا ہے کہ جس آٹو سے اے ڈی جے اتم آنند کو ٹکر ماری گئی ہے وہ رات کے وقت ہی چوری ہو گیا تھا اور چوری کی واردات کے تین گھنٹے بعد ہی اس قتل کو انجام دیا گیا۔ جج اتم آنند کا بنیادی طور پر جھارکھنڈ کے ہزاری باغ سے تعلق تھا۔

این ڈی ٹی وی کی رپورٹ کے مطابق اتم آنند دھنباد شہر میں گینگسڑ امن سنگھ سمیت 15 سے زیادہ مافیا اور جرائم پیشہ افراد کے مقدموں کی سماعت کر رہے تھے اور حال ہی میں انہوں نے کئی گینگسٹروں کی درخواست ضمانت نامنظور کر دی تھی۔ ان کی بیوی نے نامعلوم افراد کے خلاف قتل کی ایف آئی آر درج کرائی ہے۔

ادھر، سپریم کورٹ بار ایسوسی ایشن کے چیئرمین وکاس سنگھ نے سپریم کورٹ سے جھارکھنڈ میں اے ڈی جے اتم آنند کے قتل کی سی بی آئی کے ذریعے تفتیش کرانے کا مطالبہ کیا ہے۔ وکاس سنگھ نے کہا کہ عدلیہ کو آزاد اور منصف کی حفاظت ہونا چاہئے۔ انہوں نے کہا کہ سی سی ٹی وی فوٹیج سے صاف ظاہر ہو رہا ہے کہ یہ سازش کے تحت کیا گیا ایک قتل ہے۔

ادھر، جھارکھنڈ ہائی کورٹ نے اس معاملہ میں از خود نوٹس لے لیا ہے۔ ہائی کورٹ نے جھارکھنڈ حکومت کو نوٹس جاری کیا ہے اور پولیس اور انتظامیہ سے بھی جواب طلب کیا ہے۔ جبکہ وکاس سنگھ نے اس معاملہ میں سپریم کورٹ سے بھی از خود نوٹس لینے کا مطالبہ کیا ہے۔

وکاس سنگھ کی درخواست پر سپریم کورٹ نے کہا کہ فی الحال اس معاملہ کو ہائی کورٹ کے پاس ہی رہنے دیں، ہمارے دخل کی ضرورت نہیں ہے۔ خیال رہے کہ جھارکھنڈ ہائی کورٹ آج یعنی جمعرات کو ہی اس معاملہ کی سماعت کرے گی۔