جیون مشن گھپلہ: کیرالہ کے وزیر اعلیٰ پنارائی وجین کو جھٹکا، ای ڈی نے سابق پرنسپل سکریٹری ایم شیوشنکر کو کیا گرفتار

کوچی: کیرالہ کے وزیر اعلی پنارائی وجین کو جھٹکا دیتے ہوئے انفورسمنٹ ڈائریکٹوریٹ (ای ڈی) نے ان کے سابق پرنسپل سکریٹری ایم شیو شنکر کو کیرالہ کے سیلاب ریلیف میں مبینہ بے ضابطگیوں سے متعلق اینٹی منی لانڈرنگ کیس میں گرفتار کر لیا ہے۔ شیوشنکر کو منگل کی رات گرفتار کیا گیا تھا اور اب امکان ہے کہ ای ڈی عدالت میں پیش کیے جانے پر ان کی تحویل طلب کرے گی۔ خیال رہے کہ شیو شنکر 31 جنوری کو اپنے عہدے سے ریٹائر ہو گئے تھے۔ جیون مشن پروجیکٹ کا مقصد ان غریبوں کو مکانات فراہم کرنا تھا جنہوں نے 2018 کے سیلاب میں اپنے مکانات کھو دیئے تھے۔

جمعہ، پیر اور منگل کو شیوشنکر سے پوچھ گچھ کرنے والے ای ڈی کے افسران نے منگل کی رات 11:45 بجے ان کی گرفتاری درج کی۔ طبی معائنے کے بعد انہیں بدھ کی صبح ایرناکلم پرنسپل سیشن کورٹ میں پیش کیا جائے گا۔ اس کے ساتھ ہی شیوشنکر کو مختلف مرکزی ایجنسیوں نے بدعنوانی کے معاملات میں چار مرتبہ گرفتار کیا ہے۔ انہیں اس بار سونے کی اسمگلنگ کیس کے ملزم سوپنا سریش، سریتھ پی ایس اور سندیپ نائر کے بیانات کے بعد گرفتار کیا گیا ہے۔

تفتیشی افسران نے اس گھپلے کے سلسلے میں یونٹیک کے منیجنگ ڈائریکٹر سنتوش ایپن اور اس وقت کے لائف مشن کے سی ای او یووی جوس کے بیانات بھی ریکارڈ کیے ہیں۔ یونٹیک کے منیجنگ ڈائریکٹر سنتوش نے الزام لگایا کہ اس معاملے میں جواب دہندہ نے پروجیکٹ کے لیے 4.48 کروڑ روپے کی رشوت لی تھی۔