جے ڈی یو کے للن سنگھ کا امت شاہ پر طنز، ’اتنا گھبرانا ٹھیک نہیں!‘

پٹنہ: مرکزی وزیر داخلہ امت شاہ جمعرات کو بہار آئے اور لکھی سرائے میں ایک جلسہ عام سے خطاب کرتے ہوئے مخالفین پر سیاسی حملہ بولا۔ اس کے بعد جے ڈی یو کے قومی صدر للن سنگھ نے بھی شاہ پر پلٹ وار کرتے ہوئے ان پر غلط بیانی کا الزام عائد کیا۔ انہوں نے وزیر داخلہ نو نصیحت دیتے ہوئے کہا کہ اتنا گھبرانا ٹھیک نہیں ہے!

للن سنگھ نے ٹوئٹ کر کے امت شاہ کو چیلنج کرتے ہوئے کہا کہ ثابت کیجئے کہ منگیر میں انجینئرنگ اور میڈیکل کالج کھلوانے میں مرکزی حکومت ایک ایک روپیہ بھی لگا ہے۔ انہوں نے دعوے کے ساتھ کہا کہ منگیر انجینئرنگ اور میڈیکل نتیش کمار حکومت کے منصوبہ کا ثمر ہے اور اس میں صد فیصد ریاستی حکومت کی رقم لگی ہے۔ اس میں مرکزی حکومت کا ایک روپیہ بھی نہیں لگا ہے۔

انہوں نے یہاں تکت کہا کہ نتیش کمار کی حکومت کی حصولیابی بھی نریندر مودی کے نام کرنے کی جراْت کوئی جھوٹا شخص ہی کر سکتا ہے۔ جے ڈی یو نے کہا کہ اگر جراْت ہے تو بتائیے کہ ’ہر گھر نل کا جل’ اسکیم میں مرکزی حکومت کا کتنا روپیہ لگا ہے؟ اس اسکیم کے لیے مرکزی حکومت کی تجویز کو نتیش حکومت نے ٹھکرا دیا تھا اور ایک روپیہ بھی نہیں لیا۔ اپنی رقم سے ریاستی حکومت نے 2015 میں سات نشچے یوجنا (ساتھ عزائم منصوبہ) کے تحت اسے بہار میں کرایا۔ نگیر سے بیگوسرائے کو جوڑنے والا پل نریندر مودی حکومت کی نہیں بلکہ اٹل بہاری واجئی کا تحفہ ہے۔

للن سنگھ نے امت شاہ سے پوچھا کہ آج آپ اتنے گھبرائے ہوئے کیوں تھے کہ لگاتار آپ کے منہ سے لکھی سرائے کی جگہ منگیر نکل رہا تھا؟ مانا کہ آپ کو آئندہ لوک سبھا انتخابات میں اپنے حشر کا اندازہ ہے لیکن اتنا گھبرانا ملک کے وزیر داخلہ کی صحت کے لئے اچھا نہیں ہے۔