جموں: پالتو کتوں کا رجسٹریشن نہ کرایا تو جرمانہ عائد ہوگا، میونسپل کارپوریشن کا فرمان

جموں: جموں میونسپل کارپوریشن نے پالتو کتوں کے رجسٹریشن کا عمل شروع کرتے ہوئے کہا ہے کہ رجسٹریشن نہ کرنے والوں پر جرمانہ عائد کیا جائے گا۔ رجسٹریشن کرنے کی آخری تاریخ 31 اگست مقرر کی گئی ہے۔ کارپوریشن نے ماہ جولائی کے وسط میں ایک نوٹیفکیشن جاری کیا تھا جس میں کتے پالنے والوں سے کہا گیا تھا کہ وہ اپنے کتوں کا مقررہ مدت کے دوران رجسٹریشن کرائیں بصورت دیگر ان پر جرمانہ عائد کیا جائے گا۔

جموں میونسپل کارپوریشن کے میونسپل ویٹرنری افسر ڈاکٹر سشیل شرما نے یو این آئی کو بتایا کہ پالتو کتوں کا رجسٹریشن کرنے کے حوالہ سے نوٹس جولائی کی 15 تاریخ کو جاری کیا گیا تھا۔ انہوں نے کہا کہ اگر کتے کا رجسٹریشن کرا لیا جائے گا تو ڈاکٹروں کو یہ معلوم رہے گا کہ آیا اس کو اینٹی ریبیز ویکسین دی گئی ہے یا نہیں۔

موصوف نے کہا کہ رجسٹریشن فیس پانچ سو روپے طے کی گئی ہے جبکہ تین سو روپے سالانہ چارجز بھی ادا کرنے ہوں گے۔ انہوں نے کہا کہ اینٹی ریبیز ویکسین مہم کے علاوہ رجسٹریشن سے کارپوریشن کو پالتو کتوں کی آبادی کے بارے میں جانکاری رہے گی۔ موصوف نے کہا کہ کتے کے رجسٹریشن پر مالک کو ایک کتابچہ دیا جائے گا جس پر کتے کو دی جانے والی ویکسین کی تفصیلات درج ہوں گی اور اس کے علاوہ اس کو ایک دھات کا ٹوکن بھی دیا جائے گا جس پر رجسٹریشن نمبر درج ہوگا۔