جموں و کشمیر: پلوامہ میں مسلح تصادم کے دوران 3 جنگجو ہلاک

سری نگر: جنوبی ضلع پلوامہ کے ترال کے جنگلات میں ایک مسلح تصادم کے دوران سیکورٹی فورسز نے تین جنگجوؤں کو ہلاک کر دیا ہے۔ جموں و کشمیر پولیس کے ایک ترجمان نے بتایا کہ ضلع پلوامہ کے ترال واقع جنگلات میں جمعہ اور ہفتے کی درمیانی رات کو ہونے والے ایک مسلح تصادم کے دوران ان تین جنگجوؤں کو ہلاک کیا گیا۔ انھوں نے مزید بتایا کہ ’’مہلوک جنگجو جیش محمد سے تعلق رکھتے تھے۔ ان کی شناخت معلوم کی جا رہی ہے، نیز علاقے میں آپریشن جاری ہے۔‘‘

سرکاری ذرائع نے بتایا کہ ترال کے جنگلات میں جنگجوؤں کی موجودگی سے متعلق خفیہ اطلاع ملنے پر جموں و کشمیر پولیس، فوج کی راشٹریہ رائفلز اور سی آر پی ایف نے جمعے کی رات دیر گئے مذکورہ علاقے کو محاصرے میں لے کر تلاشی آپریشن شروع کیا۔ پولیس ترجمان کا کہنا ہے کہ ایک مشتبہ جگہ کی جانب پیش قدمی کے دوران وہاں موجود جنگجوؤں نے سیکورٹی فورسز پر فائرنگ کی جس کے بعد طرفین کے درمیان باضابطہ طور پر تصادم شروع ہوا۔

سرکاری ذرائع نے یہ بھی بتایا کہ محاصرے میں پھنسنے والے جنگجوؤں کو خودسپردگی اختیار کرنے کی پیشکش کی گئی جو انہوں نے مسترد کر دی تھی۔ آخری اطلاعات ملنے تک مسلح تصادم میں تین جنگجوؤں کو مارا جا چکا تھا جن کی لاشیں برآمد کی گئی ہیں۔ قبل ازیں سیکورٹی فورسز نے اسی ضلع کے کھریو پانپور میں جمعرات کو ایک مسلح تصادم کے دوران دو مقامی جنگجوؤں کو ہلاک کیا تھا۔