جموں میں کانگریس کا بی جے پی کے خلاف احتجاج، پتلا نذرِ آتش

جموں: کانگریس کی جموں کشمیر یونٹ نے ہفتہ کے روز شہیدی چوک جموں میں وزیر اعظم نریندر مودی کی طرف سے سابق وزیر اعظم آنجہانی راجیو گاندھی کے خلاف بیان بازی اور لیہہ میں صحافیوں کو بی جے پی کے لیڈروں کی طرف سے رشوت دینے کی کوشش کے خلاف احتجاج کرتے ہوئے بی جے پی، وزیر اعظم مودی اور ریاستی گورنر کے خلاف جم کر نعرہ بازی کی اور بی جے پی کے پتلے کو نذر آتش بھی کیا۔

واضح رہے کہ وزیر اعظم نریندر مودی نے ایک انتخابی جلسے سے خطاب کرتے ہوئے آنجہانی راجیو گاندھی پر بدعنوانی کا الزام عائد کیا تھا۔ ادھر ریاستی گورنر ستیہ پال ملک نے حال ہی میں کہا کہ آنجہانی راجیو گاندھی پہلے رشوت خور نہیں تھے لیکن بعد میں وہ کچھ لوگوں کے زیر اثر آگئے اور بوفورس کیس میں ملوث ہوگئے۔ احتجاج کے حاشیہ پر کانگریس ترجمان رویندر شرما نے میڈیا کو بتایا کہ ملک میں امت شاہ اور وزیر اعظم نریندر مودی نے گالی گلوچ کا ماحول بنا رکھا ہے۔

انہوں نے کہا ’’ملک میں امت شاہ اور وزیر اعظم نریندر مودی نے گالی گلوچ کا ماحول بنایا ہے، ملک کے لئے شہید ہونے والے سابق وزیر اعظم آنجہانی راجیو گاندھی کے خلاف توہین آمیز باتیں کی جارہی ہیں۔ ان پر ذاتی حملے کیے جا رہے ہیں اور گاندھی خاندان پر حملے کیے جا رہے ہیں۔‘‘

رویندر شرما نے کہا کہ وزیر اعظم کے پاس لوگوں کو مائل کرنے کے لئے اس کے علاوہ اور کوئی ہتھیار ہی نہیں ہے۔ انہوں نے ریاستی گورنر ستیہ پال ملک کو آنجہانی راجیو گاندھی کے خلاف بیان دینے پر آڑے ہاتھوں لیتے ہوئے کہا ’’گورنر صاحب کو بھی استعمال کیا گیا ہے اگر ان کو سیاست کرنی ہے تو اپنا عہدہ چھوڑ دیں، ورنہ اپنے عہدے کی لاج رکھیں۔ ہم ان کے عہدے کی عزت کرتے ہیں اسی لئے ان کا پتلا نذر آتش نہیں کیا گیا، بلکہ بی جے پی کا پتلا نذر آتش کیا۔‘‘ شرما نے کہا کہ گورنر کو یہ اختیار نہیں ہے کہ وہ گورنر کے عہدے پر رہ کر ایسی باتیں کریں۔

لیہہ معاملےکے حوالے سے رویندر شرما نے کہا کہ لیہہ کے صحافیوں نے بی جے پی کے لیڈروں کی طرف سے رشوت کی کوشش کے خلاف آواز بلند کرکے انہیں بے نقاب کیا ہے جس کے لئے وہ مبارک باد کے مستحق ہیں۔ انہوں نے کہا ’’لیہہ کے صحافیوں نے بی جے پی کی طرف سے رشوت دینے کی کوشش کو بے نقاب کیا ہے، بی جے پی کے لیڈروں کے خلاف ایف آئی آردرج ہوئی ہے اور ابتدائی انکوائری میں ان کے خلاف شواہد بھی سامنے آئے ہیں۔‘‘ انہوں نے کہا کہ کبھی کسی ملزم نے اپنا قصور نہیں مانا ہے اور اب ’چور مچائے شور‘ کے مصداق بی جے پی کے لیڈر اپنے آپ کو بے قصور ثابت کرنے کی کوشش کر رہے ہیں۔

شرما نے کہا کہ جب بی جے پی والے زمینی سطح پر ناکام ہوجاتے ہیں تو انہیں پاکستان، آئی ایس آئی اور کانگریس پارٹی یاد آتی ہے ورنہ لیہہ میں صحافیوں نے ان کو بے نقاب کیا تو کانگریس پارٹی کہاں سے آگئی۔ انہوں نے کہا کہ لیہہ معاملے میں ملوثین کے خلاف تحت قانون کارروائی کی جانی چاہیے۔ اس موقعہ پر کانگریس کے سینئر لیڈر رمن بھلا اور دیگر لیڈران بھی موجود تھے۔