جموں و کشمیر اسمبلی انتخابات: آخری مرحلے کے لئے 7 اضلاع کی 40 سیٹوں پر پولنگ شروع

سری نگر: جموں و کشمیر اسمبلی انتخابات کے تیسرے اور آخری مرحلے کے لئے 7 اضلاع پر محیط 40 سیٹوں پر پولنگ شروع ہوئی۔ سرکاری ذرائع نے بتایا کہ جموں و کشمیر کی چالیس سیٹوں پر منگل کی صبح ٹھیک 7 بجے پولنگ شروع ہوئی۔ اسمبلی انتخابات کے اس آخری مرحلے کے لئے رائے دہندگان کی کل تعداد 39 لاکھ 18 ہزار 200 ہے جن میں سے 20 لاکھ 933 مرد جبکہ 19 لاکھ 9 ہزار 130 خواتین ووٹرز شامل ہیں۔

حکام نے رائے دہندگان کے لئے سات اضلاع میں کل 5 ہزار 60 پولنگ مراکز قائم کئے ہیں اور ہر پولنگ مرکز پر پریزائڈنگ افسر سمیت 4 اہلکاروں پر مشتمل الیکشن عملہ تعینات ہوگا اور مجموعی طور پر اس مرحلے کے لئے 20 ہزار سے زیادہ اہلکاروں پر مشتمل الیکشن عملے کو تعینات کیا گیا ہے۔

اس مرحلے میں وادی کشمیر کی جن 16 نشستوں کی پولنگ ہو رہی ہے ان میں کرناہ، ترہگام، کپوارہ، لولاب، ہندوارہ، لنگیٹ، سوپور، رفیع آباد، اوڑی، بارہمولہ، گلمرگ، واگورہ - کریری، پٹن، سونہ واری، بانڈی پورہ اور گریز (ایس ٹی) شامل ہیں جبکہ جموں ڈویزن میں جن 24 سیٹوں کی پولنگ ہو رہی ہے ان میں اودھم پور ویسٹ، اودھم پور ایسٹ، چنی، رام نگر (ایس سی)، بنی، بلاور، بسولی، جسروٹہ، کٹھوعہ (ایس سی)، ہیرا نگر، رام گڑھ (ایس سی)، سانبہ، وجے پور، بشنا (ایس سی)، سچیت گڑھ (ایس سی)، آر ایس پورہ، جموں سوتھ، باہو، جموں ایسٹ، نگروٹہ، جموں ویسٹ، جموں نارتھ، اکھنور (ایس سی) اور چھمب شامل ہیں۔

وادی کشمیر کی 16 سیٹوں پر جو نمایاں امید وار قسمت آزمائی کر رہے ہیں ان میں سابق نائب وزیر اعلیٰ مظفر حسین بیگ، سابق وزیر تاج محی الدین، سابق وزیر اور پیپلز کانفرنس کے صدر سجاد غنی لون، پیپلز کانفرنس کے جنرل سکریٹری اور سابق وزیر عمران انصاری، اپنی پارٹی کے سینئر لیڈر اور سابق وزیر غلام حسن میر، پی ڈی پی لیڈر اور سابق وزیر سید بشارت بخاری، سابق وزیر اور نیشنل کانفرنس کے لیڈر چودھری محمد رمضان اور سابق رکن پارلیمان اور پی ڈی پی لیڈر فیاض احمد میر شامل ہیں۔

حکام نے جہاں پولنگ کے لئے تمام تر تیاریوں کو حتمی شکل دی ہے اور پولنگ مراکز پر ووٹروں اور الیکشن عملے کے لئے تمام تر سہولیات کو دستیاب رکھا ہے وہیں ہموار اور خوشگوار پولنگ کو یقینی بنانے کے لئے بھی سیکورٹی کے سخت انتظامات کئے گئے ہیں۔

قابل ذکر ہے کہ جموں و کشمیر اسمبلی انتخابات کے پہلے اور دوسرے مرحلے کی پولنگ بالترتیب 18 اور 25 ستمبر کو ہوئی تھی۔ ووٹوں کی گنتی 8 اکتوبر کو ہوگی۔ یہ دفعہ370 کی تنسیخ کے بعد جموں و کشمیر میں ہو رہے پہلے اسمبلی انتخابات ہیں۔