جموں و کشمیر: کشتواڑ کے ایک گاؤں میں شدید آتشزدگی، 70 سے زائد مکانات جل کر خاک میں تبدیل

جموں و کشمیر کے کشتواڑ میں آتشزدگی کا ایک خوفناک واقعہ پیش آیا ہے جس میں 70 سے زیادہ جل کر خاک ہو گئے ہیں۔ واقعہ پیر کے روز کا ہے جب ایک گھر میں آگ لگی، اور پھر دیکھتے ہی دیکھتے اس نے آس پاس کے دیگر گھروں کو بھی اپنی زد میں لے لیا۔ مقامی لوگوں کا کہنا ہے کہ فائر بریگیڈ اور ایمرجنسی خدمات ہوائی راستہ سے جائے حادثہ پر پہنچیں اور کسی طرح آگ پر قابو پایا گیا، ورنہ یہ آگ مزید کئی گھروں کو خاک میں ملا دیتی۔

آتشزدگی کا یہ واقعہ کشتواڑ کے مالون گاؤں میں پیش آیا جہاں موٹر گاڑی چلنے لائق کوئی سڑک نہیں ہے۔ یہی وجہ ہے کہ فائر بریگیڈ کے اہلکاروں کو جائے وقوع تک پہنچنے میں تاخیر ہوئی اور آگ ایک گھر سے دوسرے گھر، دوسرے سے تیسرے گھر تک ہوتی ہوئی کم و بیش 6 درجن گھروں تک پھیل گئی۔ آگ لگنے کی خبر ملنے پر سینئر افسران فوراً جائے حادثہ پر ضرور پہنچ گئے تھے اور مقامی لوگوں کی مدد سے آگ بجھانے کی کوشش کی۔ اچھی بات یہ ہے کہ اس آتشزدگی واقعہ میں کسی ہلاکت کی خبر نہیں ہے۔ راحت و بچاؤ کاری کا عمل منگل کی صبح تک جاری رہا۔

افسران کا کہنا ہے کہ مالون گاؤں میں پیر کی دوپہر تقریباً 3 بجے ایک گھر میں رکھے بھوسے نے آگ پکڑ لی تھی جو فوراً پورے گھر میں پھیل گئی۔ چونکہ بیشتر گھر لکڑیوں سے بنے تھے اس لیے آگ پھیلنے میں زیادہ وقت نہیں لگا۔ لوگوں نے ان گھروں میں سردی کے پیش نظر مویشیوں کو کھلانے کے لیے بھوسا رکھا ہوا تھا جس کی وجہ سے آگ تیزی کے ساتھ پھیلتی ہی چلی گئی۔