کشمیر: کولگام میں مسلح تصادم کے مقام پر 7 عام شہری جاں بحق، 4 درجن زخمی

سرینگر: جنوبی کشمیر کے ضلع کولگام کے لارو میں اتوار کو مسلح تصادم کے مقام پر ایک پراسرار دھماکے اور سیکورٹی فورسز کی مبینہ فائرنگ کے نتیجے میں 7 عام شہری ہلاک جبکہ قریب 4 درجن دیگر زخمی ہوگئے۔ لارو میں مسلح تصادم کے مقام پر بڑے پیمانے کے جانی نقصان کے حوالے سے سیکورٹی اداروں اور مقامی لوگوں کی طرف سے متضاد بیانات سامنے آئے ہیں۔

ریاستی پولس کا کہنا ہے کہ تصادم ختم ہونے کے ساتھ ہی مقامی لوگوں کی ایک بڑی تعداد تصادم کی جگہ پر پہنچی اور اس دوران وہاں کوئی دھماکہ خیز مواد پھٹنے سے انسانی جانوں کا نقصان ہوا۔ اس کے برعکس مقامی لوگوں کا کہنا ہے کہ چار شہری دھماکہ خیز مواد کے پھٹنے جبکہ باقی تین سیکورٹی فورسز کی مظاہرین پر فائرنگ کے نتیجے میں جاں بحق ہوئے۔

مقامی لوگوں کے مطابق زخمیوں کی تعداد 4 درجن سے زیادہ ہے۔ اطلاعات کے مطابق مسلح تصادم کے مقام پر زخمی ہونے والوں کو جنوبی کشمیر اور سری نگر کے مختلف اسپتالوں میں داخل کرایا گیا۔ ضلع اسپتال کولگام میں 3، سری نگر کے مہاراجہ ہری سنگھ اسپتال (ایس ایم ایچ ایس) اسپتال میں 2 جبکہ شیر کشمیر انسٹی چیوٹ آف میڈیکل سائنسز (سکمز) میں ایک زخمی شہری زخموں کی تاب نہ لاتے ہوئے دم توڑ گئے-

مہلوک شہریوں کی شناخت عبید لاوے ولد محمد مقبول لاوے ، عزیر احمد، منصور احمد، طالب مقبول ساکنان لارو ، عاقب احمد ولد گل محمد ساکنہ مکہان، تجمل احمد ساکنہ دینو بوگنڈ اور ارشاد احمد ساکنہ شورٹ کے بطور کی گئی ہے۔ مہلوکین میں سے بیشتر نوجوان ہیں۔

ریاستی پولیس کے ایک ترجمان نے بتایا کہ مقامی لوگوں سے گذارش کی گئی تھی کہ وہ مسلح تصادم کے مقام پر نہ جائیں۔ انہوں نے بتایا ’گذارشوں کے باوجود عام شہری تصادم کے مقام پر پہنچ گئے۔ وہاں پر کچھ دھماکہ خیز مواد پھٹ گیا جس کے نتیجے میں عام شہریوں کا جانی نقصان ہوا‘۔ بتادیں کہ لارنو نامی میں اتوار کی صبح جنگجوؤں اور سیکورٹی فورسز کے درمیان تصادم ہوا جس میں تین مقامی جنگجو مارے گئے۔

مسلح تصادم کے دوران سیکورٹی فورسز کے 2 اہلکار بھی زخمی ہوئے ۔ انتظامیہ نے ضلع میں موبائیل فون اور انٹرنیٹ خدمات منقطع کرادی ہیں۔ اس کے علاوہ احتجاجی مظاہروں کو روکنے کے لئے سخت ترین سیکورٹی پابندیاں نافذ کردی گئی ہیں۔

جموں وکشمیر کے سابق وزرائے اعلیٰ عمر عبداللہ اور محبوبہ مفتی نے جنوبی کشمیر کے ضلع کولگام کے لارو میں اتوار کو مسلح تصادم کے مقام پر ایک پراسرار دھماکے اور سیکورٹی فورسز کی مبینہ فائرنگ کے نتیجے میں عام شہریوں کے ہلاک ہونے پر دکھ اور صدمے کا اظہار کیا ہے۔

عمر عبداللہ نے سوالیہ انداز میں کہا ہے کہ کب تک ہم زمینی حقائق کو نظرانداز اور مخدوش صورتحال پر پردہ ڈالتے رہیں گے۔ انہوں نے اپنے ایک ٹویٹ میں کہا ’کولگام سے خوفناک خبر آرہی ہے۔ اللہ مہلوکین کو جنت الفردوس میں جگہ عطا کرے۔ کب تک ہم زمینی حقائق کو نظرانداز کرتے رہیں گے؟ کب تک کشمیر کی مخدوش صورتحال پر پردہ ڈالتے رہیں گے‘۔

محبوبہ مفتی نے کہا ہے کہ اس سانحہ کی جتنی بھی مذمت کی جائے، وہ کم ہے۔ انہوں نے اپنے ایک ٹویٹ میں کہا ’کولگام واقعہ کی خبر سے بہت دکھ پہنچا ہے۔ وہاں عام شہری ایک بار پھر تشدد کی زد میں آگئے ہیں۔ اس واقعہ نے جلتی پر تیل کا کام کیا ہے۔ اس سانحہ کی جتنی بھی مذمت اور سوگواروں سے جتنی بھی تعزیت کی جائے، وہ کم ہے‘۔

جموں وکشمیر کے گورنر کے مشیر کے وجے کمار اور ڈائریکٹر جنرل پولس دلباغ سنگھ نے لارو کولگام میں جائے تصادم کے نزدیک ایک دھماکے میں ہوئیں شہری جانوں کے نقصان پر افسوس اور صدمے کا اِظہار کیا ہے۔

اتوار کی شام ایک مشترکہ بیان میں مشیر موصوف اور ڈی جی پی نے اس حادثے میں جاں بحق ہوئے شہریوں کے لواحقین کے ساتھ ہمدردی اور تعزیت کا اِظہار کیا ہے۔ انہوں نے کہا کہ رپورٹوں کے مطابق تصادم ختم ہونے کے بعد عام شہری اس جگہ کی طرف دوڑ پڑے اور وہاں ایک دھماکہ ہوا جس کے نتیجے میں یہ جانیں تلف ہوئیں۔

انہوں نے شہریوں سے اپیل کی کہ وہ اس طرح کے مقامات کا رُخ تب تک نہ کریں جب تک نہ اِن مقامات کو محفوظ قرار دیا جائے۔