سردار پٹیل کے نام سے 500 بیڈ کا کووڈ سینٹر شروع، لیکن داخلہ کے لئے افسر کی منظوری لازمی

کورونا وبا سے بری طرح متاثر راجدھانی دہلی میں مریضوں کے لئے ایک راحت کی خبر ہے۔ دہلی کے چھترپور علاقہ میں آئی ٹی بی پی نے رادھا سوامی ستسنگ ویاس آشرم کی جگہ پر 500 بستروں کا نیا کووڈ کیئر سینٹر شروع کیا ہے۔ دہلی کے وزیر اعلی اروند کیجریوال، نائب وزیر اعلی منیش سسودیا اور وزیر صحت ستیندر جین نے اس نئے کووڈ کیئر سینٹر کا دورہ کیا اور انتظامات کا جائزہ لیا۔

واضح رہے اس سے پہلے ڈی آر ڈی او نے ائیر پورٹ کے قریب ایک اسپتال بنایا ہے اور اس کا نام بھی سردار پٹیل پر ہی رکھا ہے۔ چھترپور میں اس اسپتال کے شروع ہونے کے بعد دہلی والوں کو راحت تو ضرور ملی ہے، لیکن اس کے ساتھ ایسی شرط جوڑ دی گئی ہے جس کی وجہ سے پریشانیاں بڑھ بھی سکتی ہیں۔ اے بی پی نیوز پر شائع خبر کے مطابق اس اسپتال میں داخلہ کے لئے مریض کو ضلع سرویلانس افسر سے منظوری لینا لازمی ہوگا۔ اس منظوری کے بعد ہی وہاں داخلہ ملے گا۔

واضح رہے ریاست اتر پردیش میں بھی اس طرح کا ایک قانون تھا کہ اسپتالوں میں داخلہ کے لئے سی ایم او کی منظوری لازمی تھی، جس کی وجہ سے مریضوں کے علاج میں تاخیر ہوئی اور کئی قیمتی جانیں چلی گئیں۔ اس پر جب کافی ہنگامہ ہوا تو اتر پردیش حکومت نے یہ فیصلہ واپس لے لیا تھا۔

چھترپور میں کھولے گئے اس کووڈ کیئر سینٹر میں آئی سی یو کا انتظام نہیں ہے اس لئے انتظامیہ کا کہنا ہے کہ ایسے مریض اس سینٹر میں نہ آئیں جن کی حالت نازک ہے یا جن کو آئی سی یو کی ضرورت ہے۔