کانگریس صدر سونیا گاندھی کورونا سے متاثر پائے جانے کے بعد آئسولیٹ، ہلکی علامات ظاہر

نئی دہلی: کانگریس پارٹی کی عبوری صدر سونیا گاندھی کورونا وائرس سے متاثر پائی گئی ہیں۔ ہلکی علامات ظاہر ہونے کے بعد انہوں نے خود کو آئسولیٹ کر لیا ہے۔ کانگریس کے جنرل سکریٹری رندیپ سنگھ سرجے والا نے اس کی تصدیق کی ہے۔ کانگریس لیڈر سرجے والا نے ٹوئٹ کیا کہ ’’کانگریس صدر سونیا گاندھی گزشتہ ایک ہفتہ سے زیادہ وقت سے لیڈران اور کارکنان سے ملاقات کر رہی تھیں، جن میں سے کچھ کورونا سے متاثر پائے گئے ہیں۔‘‘

سرجے والا نے بتایا کہ کانگریس صدر کو گزشتہ روز سے ہلکا بخار اور کورونا کی علامات ظاہر ہونے لگیں۔ ٹیسٹ کیا گیا تو وہ کووڈ پازیٹو پائی گئیں۔ طبی مشورے کے مطابق کانگریس صدر نے خود کو آئسولیٹ کر لیا ہے۔ بڑی تعداد میں کانگریس کی خاتون اور مرد کارکنان، جو فکرمندی ظاہر کر رہے ہیں، ان سے میں کہنا چاہتا ہوں کہ وہ بالکل ٹھیک ہیں اور صحت یاب ہو رہی ہیں۔ نیک خواہشات کے لیے ہم سبھی کا شکریہ ادا کرتے ہیں۔

سرجے والا نے مزید کہا کہ جیسا کہ پہلے بتایا گیا ہے، کانگریس صدر 8 جون کو ای ڈی کے سامنے پیش ہوں گی۔ ہم، انڈین نیشنل کانگریس کی جانب سے آپ کو مستقبل کی کسی بھی پیشرفت سے آگاہ کرتے رہیں گے۔