کیا بی جے پی میں نتیش کے چہرے کو لے کر کوئی اختلاف ہے!

نتیش کمار آج جے ڈی یو اور این ڈی اے اتحاد حکومت کے وزیر اعلی ضرور ہیں لیکن یہ تصویر ابھی صاف نہیں ہے کہ اگلے سال ہونے والے بہار اسمبلی انتخابات میں کون وزیر اعلی کے چہرے کا دعویدار ہوگا۔ نو منتخب بہار بی جے پی کے صدر سنجے جیسوال نے صاف طور پر کہا ہے کہ سال 2020 میں وزیر اعلی کا امیدوار کون ہوگا یہ پارٹی کے صدر امت شاہ طے کریں گے۔ یہ بات انہوں نے ایک ہندی نیوز چینل سے گفتگو کرتے ہوئے کہی۔

سنجے جیسوال نے کہا کہ ریاست میں اتحاد کی حکومت ہے اور اس حکومت میں سب برابر کے حقدار ہیں۔ جب ان سے پوچھا گیا کہ بہار کے نائب وزیر اعلی اور بی جے پی کے سینئر رہنما سشیل مودی نے تو اس بات کا اعتراف کیا ہے کہ نیتش کمار ہی ان کے کپتان ہوں گے تو سنجے جیسوال نے کہا کہ بی جے پی کے تمام فیصلے پارلیمانی بورڈ اور پارٹی کی مرکزی قیادت کرتی ہے جس کو ہم سب مانتے ہیں۔

بی جے پی این آر سی کو مدا بنانا چاہتی ہے اور جے ڈی یو کی رائے اس پر بی جے پی سے الگ ہے۔ اس پر سنجے جیسوال کا کہنا تھا کہ اگر بی جے پی اور جے ڈی یو کی ایک ہی رائے ہوتی تو پھر دو پارٹیوں کی کیا ضرورت ہے، اس میں کوئی دو رائے نہیں کہ ہم دونوں پارٹیوں میں نظریاتی اختلاف ہیں۔

واضح رہے ایک جانب بہار میں بی جے پی اور جے ڈی یو ساتھ میں حکومت چلاتے ہیں دوسری جانب پڑوسی ریاست جھارکھنڈ میں دونوں ایک دوسرے کے خلاف انتخاب لڑتے ہیں۔ واضح رہے ڈاکٹر سنجے جیسوال کو بہار بی جے پی کا صدر 14ستمبر کو بنایا گیا تھا، سنجے جیسوال کا تعلق پسماندہ ذات سے ہے۔ جیسوال کے بیان سے لگتا ہے کہ ابھی بی جے پی میں اس بات پر اتفاق نہیں ہے کہ اگلے سال ہونے والے انتخابات میں نتیش کمار ہی وزیر اعلی کا چہرہ ہوں گے۔