کیا سیما کا پاکستان سے آنے کا مقصد کچھ اور ہے؟

نئی دہلی: پاکستان سے مبینہ طور پر سچن سے محبت  کی وجہ  سے غیر قانونی طور پر ہندوستان آئی سیما سوالوں کے گھیرے میں ہے۔  وہ  صرف غیر قانونی طور پر آئی ہی نہیں تھی بلکہ وہ ہندوستان میں غیر قانونی طور پر رہ رہی تھی اور جب پتہ لگا تو اس نے بتایا کہ وہ سچن کی محبت میں ہندوستان آئی ہے لیکن اس کے غیر قانونی طریقے سے آنے اور رہنے پر ایجنسیاں اس سے پوچھ گچھ کر ہی ہیں۔

 اتر پردیش  اے ٹی ایس سیما حیدر سے مسلسل پوچھ گچھ کر رہی ہے۔ نیوز پورٹل ’اے بی پی ‘ پر شائع خبر کے مطابق سیما سے  نامعلوم مقام پر گزشتہ کئی گھنٹوں سے پوچھ گچھ جاری ہے۔ اے ٹی ایس ذرائع کے مطابق سیما سے جو بھی سوال کیا جا رہا ہے، وہ صرف اتنا کہہ رہی ہے کہ میں یہاں سچن کی محبت میں آئی ہے۔ سیما نے پوچھ گچھ کے دوران نوئیڈا پولیس کو یہی جواب دیا تھا۔ اس معاملے میں سچن اور سیما کو آمنے سامنے بٹھا کر کراس پوچھ گچھ کی گئی تھی اور اس میں ابھی تک کوئی بڑی بات سامنے نہیں آئی۔

شائع خبر  میں کہا گیا ہے کہ اے ٹی ایس ذرائع کے مطابق سیما نے بہت سخت پیشہ ورانہ تربیت حاصل کی ہوگی، جس کے چلتے وہ بہت ہی سدھے ہوئے جواب دے رہی ہے۔ اب یہ بھی کہا جا رہا ہے کہ پولیس تفتیش کے دوران ماہر نفسیات کو اپنے ساتھ بٹھا سکتی ہے تاکہ سیما کے جھوٹ کی تہہ تک پہنچا جا سکے۔ خبروں میں کہا جا رہا ہے کہ سیما کے پاس کئی موبائل ہیں، ان میں سے کئی کو توڑا بھی گیا ہے اور ان کے بھائی پاکستانی فوج میں ہیں۔

یوپی اے ٹی ایس کی ٹیم نے سیما اور سچن کو ایک ساتھ بٹھایا اور کئی اہم ثبوتوں  پر سوال کئے۔ اس میں نیپال میں ان کی ملاقات کے بارے میں بھی سوالات پوچھے گئے۔ قبل ازیں بتایا گیا تھا کہ سیما کے پاس  سے دو پاسپورٹ برآمد ہوئے ہیں۔ اس کے علاوہ پولیس کو اس کے پاس سے ایک شناختی کارڈ بھی ملا ہے۔ پولیس سے موصول ہونے والی معلومات کے مطابق سیما اور سچن کی ملاقات نیپال میں ہوئی، جہاں دونوں تقریباً ایک ہفتے تک ایک ہوٹل میں رہے۔

واضح رہے  کہ سیما مئی میں غیر قانونی طور پر ہندوستان میں داخل ہوئی تھی اور اب اپنے ہندوستانی ساتھی سچن مینا کے ساتھ گریٹر نوئیڈا میں رہ رہی ہے۔ سیما کے پاس کئی فون اور دیگر چیزیں ملنے کی وجہ سے اس پر شک پیدا ہوا، جس کے بعد یو پی اے ٹی ایس نے اسے اپنی تحویل میں لے لیا ہے۔ سیما (30) اور سچن (22) کو گریٹر نوئیڈا پولیس نے 4 جولائی کو گرفتار کیا تھا لیکن ایک عدالت نے 7 جولائی کو ان دونوں کو ضمانت دے دی۔