ہندوستانی ریلوے نے پہلوان ونیش پھوگاٹ اور بجرنگ پونیا کا استعفیٰ منظور کیا

ہندوستانی ریلوے نے سابق پہلوان بجرنگ پونیا اور ونیش پھوگاٹ کا استعفیٰ منظور کر لیا ہے۔ گزشتہ دنوں دونوں پہلوانوں نے ریلوے سے استعفیٰ دے دیا تھا۔ اب یہ دونوں سیاست میں قدم رکھتے ہوئے کانگریس پارٹی میں شمولیت بھی اختیار کر چکے ہیں۔ ونیش پھوگاٹ کو جہاں ایک طرف ہریانہ کے جولانہ سے پارٹی کا انتخابی ٹکٹ ملا ہے وہیں دوسری طرف بجرنگ پونیا کسان کانگریس کے ورکنگ چیئرمین بنائے گئے ہیں۔

ونیش پھوگاٹ کے سیاست میں آنے کو ہریانہ میں ایک بڑی سیاسی تبدیلی کے طور پر دیکھا جا رہا ہے۔ ان کے کھاپ پنچایتوں اور کسانوں کے ساتھ مضبوط رشتے ہیں جس سے انہیں انتخاب میں بڑی حمایت ملنے کی امید کی جا رہی ہے۔ ونیش پھوگاٹ نے ہریانہ میں سیاسی گہما گہمی کے درمیان اپنی انتخابی تشہیر بھی شروع کر دی ہے اور لوگوں کی حمایت اور پیار کے لیے ان کا شکریہ ادا کیا ہے۔ پیرس اولمپک میں شاندار مظاہرہ کے باوجود تمغہ سے محروم رہنے والی ونیش پھوگاٹ اب عوام کے ایک مضبوط رہنما کے طور پر ابھرنے کی کوشش کر رہی ہیں۔ ہریانہ کے لوگوں کو بھی اپنی اس بیٹی سے کافی امیدیں وابستہ ہیں۔

غور طلب رہے کہ ہریانہ میں اسمبلی انتخابات 5 اکتوبر کو ہوں گے اور ووٹوں کی گنتی 8 اکتوبر کو کی جائے گی۔ حالانکہ پہلے انتخاب کی تاریخ یکم اور 4 اکتوبر تھی لیکن انتخابی کمیشن نے اس میں تبدیلی کر دی ہے۔ کمیشن نے اس کے پیچھے کی وجہ بتاتے ہوئے صفائی دی تھی کہ بشنوئی طبقہ کے ووٹنگ کے حق اور ان کی روایت دونوں کی عزت کرنے کے سبب یہ فیصلہ لیا گیا۔ واضح ہو کہ بشنوئی سماج نے اسوج اماوسیہ تہوار میں حصہ لینے کی صدیوں پرانی روایت کو ابھی تک برقرار رکھا ہوا ہے۔ اس دن بشنوئی لوگ اپنے گرو جمبشیر کی یاد میں تہوار مناتے ہیں۔ راجستھان کی نوکھا تحصیل میں قریب 490 سال سے یہ میلہ لگاتار منعقد ہوتا رہا ہے۔