ایشیا کپ فائنل: سنسنی خیز مقابلہ میں ہندوستان فتحیاب، آخری گیند پر ملی جیت

ایشیا کپ کا فائنل مقابلہ ہندوستان نے بنگلہ دیش کو 3 وکٹ سے ہرا دیا ہے۔ فائنل کا یہ مقابلہ سانسیں روک دینے والا ثابت ہوا اور ہندوستان کو آخری گیند پر جیت ملی۔ جڈیجہ کے آوٹ ہونے کے بعد میدان پر اترے زخمی کیدار جادھو نے بہت سنبھل کر کھیلتے ہوئے اطمینان سے سنگل لینے کو ترجیح دی اور دوسری طرف سے کلدیپ یادو نے بھی ان کا بھرپور ساتھ دیا۔

جیسے ہی آخری گیند پر کیدار جادھو نے لیگ بائی رن لیا بنگلہ دیشی کھلاڑیوں میں غم کا ماحول چھا گیا۔ لیکن دوسری طرف ہندوستانی کھلاڑی جشن میں ڈوب گئے۔ اسٹیڈیم میں ہندوستانی شیدائیوں میں بھی خوشی کا ماحول چھا گیا۔

مقابلہ بہت دلچسپ مرحلہ میں پہنچ گیا ہے۔ ہندوستان کا ساتواں وکٹ گر گیا ہے اور جیتنے کے لیے 11 گیندوں میں 9 رن بنانے ہیں۔

ہندوستان دھیرے دھیرے فتح کی طرف بڑھ رہا ہے لیکن بنگلہ دیش کی جانب سے بھی جیت کے لیے پوری کوششیں جاری ہیں۔ 45 اوور کے بعد ہندوستان نے 197 رن بنا لیے ہیں اور دھونی کے بعد کوئی وکٹ نہیں گرا ہے۔ میدان میں رویندر جڈیجہ اور بھونیشور کمار بہت آسانی کے ساتھ سنگل کھیل رہے ہیں۔

ہندوستان نے 40 اوور میں 172 رن بنا لیے ہیں لیکن 5 وکٹ گرنے سے ٹیم پر دباو بن گیا ہے۔ ہندوستان کی مشکلیں اس لیے بھی بڑھ گئی ہیں کیونکہ کیدار جادھو ریٹائرڈ ہرٹ ہو کر پویلین لوٹ چکے ہیں۔ اس وقت رویندر جڈیجہ اور بھونیشور کمار میدان پر موجود ہیں۔

بنگلہ دیش کی جانب سے مستفیض الرحمن نے بہترین گیندباز کا مظاہرہ کرتے ہوئے 8 اوور میں 31 رن دے کر ایک وکٹ لیا ہے جب کہ کپتان مشرف مرتضیٰ نے 9 اوور میں 31 رن دے کر 1 وکٹ لیا۔ روبیل حسین نے 7 اوور میں 14 رن دے کر 1 وکٹ لے کر کافی متاثر کیا ہے اور محمود اللہ نے بھی 4 اوور میں 22 رن دے کر ایک وکٹ لیا ہے۔ 1 وکٹ نجم الاسلام کے حصے میں گیا ہے جنھوں نے 9 اوور میں 48 رن دیے ہیں۔

مہندر سنگھ دھونی کی سمجھداری بھری گیندبازی کے ساتھ ہندوستان نے 150 رن مکمل کر لیے ہیں۔ حالانکہ 223 رن کا پیچھا کرتے ہوئے اس وقت 4 وکٹ گر چکے ہیں لیکن کیدار جادھو دھونی کا اچھا ساتھ دے رہے ہیں۔ ہندوستان نے یہ 150 رن 34ویں اوور میں مکمل کیا۔ آوٹ ہونے والے بلے بازوں میں روہت شرما، شکھر دھون، امباتی رائیڈو اور دنیش کارتک ہیں۔ دنیش کارتک کو 37 رن پر محموداللہ نے ایل بی ڈبلیو آوٹ کیا۔ دھونی 57 گیند میں 33 رن بنا کر کھیل رہے ہیں۔ ہندوستان کا اسکور 34 اوور میں 4 وکٹ پر 152 رن ہے۔

ہندوستان اور بنگلہ دیش کے درمیان ایشیا کپ کا فائنل مقابلہ کافی دلچسپ ہوتا ہوا نظر آ رہا ہے۔ امید کی جا رہی تھی کہ ہندوستانی ٹیم 223 رنوں کا ہدف بہ آسانی حاصل کر لے گی لیکن جس طرح سے بنگلہ دیش کے گیندبازوں نے شکھر دھون اور امباتی رائیڈو کو سستے میں آؤٹ کر دیا ہے اس سے مقابلے دلچسپ ہو گیا ہے۔ اس وقت ہندوستان نے 10 اوور میں 2 وکٹ کے نقصان پر 57 رن بنائے ہیں۔ کپتان روہت شرما 31 گیندوں پر 36 بنا کر کھیل رہے ہیں اور دنیش کارتک نے 8 گیندوں پر 3 رن بنائے ہیں۔

شکھر دھون کے بعد امباتی رائیڈو بھی آؤٹ ہو گئے ہیں اور انھوں نے محض 2 رن بنائے۔ رائیڈو کا وکٹ بنگلہ دیش کے کپتان مشرف مرتضیٰ نے لیا۔ اس وکٹ کے ساتھ ہی بنگلہ دیش خیمہ میں جشن کا ماحول ہے اور وہ ہندوستان پر دباؤ ڈالنے میں کامیاب نظر آ رہے ہیں۔ حالانکہ دوسری طرف ہندوستانی کپتان روہت شرما اچھی بلے بازی کر رہے ہیں۔ انھوں نے 22 گیندوں میں 28 رن بنائے ہیں جس میں 2 چھکا اور 2 چوکا بھی شامل ہے۔

ایشیا کپ کے فائنل میں ہندوستان نے بنگلہ دیش کے خلاف 223 رنوں کا پیچھا کرتے ہوئے تیز شروعات کی ہے۔ حالانکہ پانچویں اوور کی چوتھی گیند پر شکھر دھون نجسم الاسلام کا شکار ہو گئے اور 15 رن بنا کر ہی پویلین لوٹ گئے، لیکن دوسری طرف روہت شرما بھی جارحانہ بلے بازی کر رہے ہیں۔ وہ اس وقت 14 گیندوں پر 20 رن بنا چکے ہیں۔ ان کا ساتھ دینے امباتی رائیڈو آئے ہیں۔ ہندوستان اس وقت 5 اوور میں 1 وکٹ کے نقصان پر 35 رن ہے۔

بنگلہ دیش کی پوری ٹیم 48.3 اوور میں 222 رن پر آؤٹ ہو گئی۔ لیٹن داس کے علاوہ کسی دیگر بلے باز آج ہندوستانی گیندبازوں کے سامنے اچھی بلے بازی نہیں کر سکے۔ مہندر سنگھ دھونی کی وکٹ کیپنگ بھی آج لاجواب رہی جس کی وجہ سے کئی کھلاڑی اسٹمپ اور رن آؤٹ ہوئے۔

ہندوستان کی جانب سے کلدیپ یادو نے سب سے زیادہ 3 وکٹ لیے۔ انھوں نے 10 اوور میں 45 رن لیے۔ کیدار جادھو نے 9 اوور میں 41 رن دے کر دو وکٹ لیے۔ بمراہ اور چہل کے نام ایک ایک وکٹ رہا۔ بھونیشور کمار نے حالانکہ 7 اوور میں محض 33 رن دیے لیکن انھیں کوئی وکٹ حاصل نہیں ہو سکا۔ رویندر جڈیجہ کو بھی کوئی وکٹ نہیں ملا اور انھوں نے 6 اوور میں 31 رن دیے۔ بنگلہ دیش کے تین کھلاڑی رن آؤٹ ہوئے جس سے پتہ چلتا ہے کہ آج ان کی وکٹوں کے درمیان دوڑ بہت خراب رہی۔

لگاتار وکٹ گرنے کی وجہ سے بنگلہ دیش کی ٹیم مشکل میں ہے اور اس وقت اس کے سات وکٹ گر چکے ہیں۔ 45 اوور ختم ہونے تک بنگلہ دیش نے 202 رن بنا لیے ہیں اور امید کی جا رہی ہے کہ وہ 250 رن کے اندر ہی سمٹ جائے گی۔ اگر ایسا ہوتا ہے تو ہندوستانی بلے بازوں کو دیکھتے ہوئے یہ ہدف حاصل کرنا زیادہ مشکل نہیں ہوگا۔

بنگلہ دیش کا ساتواں وکٹ گر گیا ہے اور آؤٹ ہونے والے بلے باز کپتان مشرف مرتضیٰ ہیں۔ انھیں بھی کلدیپ یادو نے مہندر سنگھ دھونی کے ہاتھوں اسٹمپ کرایا۔ مشرف مرتضیٰ بڑا شاٹ مارنے کی کوشش میں آگے بڑھے تھے لیکن گیند ان کے بلے سے نہیں لگی اور مہندر سنگھ دھونی نے اسٹمپ کرنے میں کوئی غلطی نہیں کی۔ بنگلہ دیش کا اسکور اس وقت 196 رن پر سات وکٹ ہے۔

بنگلہ دیش ٹیم کو بہترین شروعات دینے اور اچھی پوزیشن میں پہنچانے کے بعد لیٹن داس آؤٹ ہو گئے ہیں۔ انھیں کلدیپ یادو کی گیند پر مہندر سنگھ دھونی نے اسٹمپ آؤٹ کیا۔ تھرڈ امپائر نے بہت نزدیکی معاملہ ہونے کے بعد انھیں آؤٹ قرار دیا۔ لیٹن داس نے 117 گیندوں میں بہترین 121 رن بنائے۔ اس اننگ کے دوران لیٹن نے 2 چھکا اور 12 چوکے لگائے۔

لیٹن داس اور سومیہ سرکار نے پانچ وکٹ گرنے کے بعد بنگلہ دیش اننگ کو سنبھال لیا ہے۔ دونوں نے مزید کوئی وکٹ نہیں گرنے دیا ہے اور دونوں ہی بہت اچھے انداز میں کھیل رہے ہیں۔ 40 اوور کے بعد ٹیم کا اسکور 178 رن ہے اور لیٹن داس 111 گیندوں پر 111 رن بنا کر اور سومیہ سرکار 29 گیندوں پر 18 رن بنا کر کھیل رہے ہیں۔

بنگلہ دیش نے محموداللہ کی شکل میں پانچواں وکٹ بھی گنوا دیا ہے۔ اس وقت 30 اوور ہو چکے ہیں اور بنگلہ دیش کا اسکور 160 رن ہے۔ لیٹن داس اب بھی وکٹ پر ڈٹے ہوئے ہیں اور ان کا ساتھ دینے کے لیے سومیہ سرکار آئے ہیں۔ محموداللہ کو کلدیپ یادو نے بمراہ کے ہاتھوں کیچ آؤٹ کرایا۔ لیٹن داس 100 گیند میں 107 رن بنا کر اور سومیہ سرکار 10 گیند میں 4 رن بنا کر کھیل رہے ہیں۔

ہندوستانی گیندبازوں نے شروع میں مایوس کن کارکردگی کا مظاہرہ کرنے کے بعد بہترین واپسی کی ہے۔ خصوصی طور پر ہندوستان کے اسپن گیندبازوں نے بنگلہ دیش کو جم کر کھیلنے کا موقع نہیں دیا۔ لیٹن داس کو چھوڑ کر کوئی بھی کھلاڑی بہتر پوزیشن میں نظر نہیں آیا۔ کلدیپ یادو نے 8 اوور میں 29 رن دے کر ایک وکٹ حاصل کیا ہے جب کہ کیدار جادھو 6 اوور میں 27 رن دے کر دو وکٹ حاصل کرنے میں کامیاب ہوئے ہیں۔ ایک وکٹ یجوویندر چہل کو ملا ہے جنھوں نے 6 اوور میں 26 رن دیے ہیں۔ ایک وکٹ رن آؤٹ کی شکل میں گرا ہے۔

ہندوستانی گیندبازوں نے بہترین واپسی کرتے ہوئے بنگلہ دیش کے چار وکٹ گرا دیے ہیں اور 30 اوور کے بعد بنگلہ دیش کا اسکور 147 رن ہے۔ گویا کہ بنگلہ دیش کا رن ریٹ 5 سے بھی کم ہو گیا ہے۔ حالانکہ ایک طرف لیٹن داس اچھی بلے بازی کر رہے ہیں اور وہ سنچری بھی مکمل کر چکے ہیں۔ اس وقت وہ 90 گیند میں 101 رن بنا کر کھیل رہے ہیں جب کہ محموداللہ نے 2 گیندوں کا سامنا کر کے 1 رن بنائے ہیں۔

ایک طرف لیٹن داس نے اپنی سنچری مکمل کر لی ہے اور دوسری طرف ٹیم کے 4 کھلاڑی آؤٹ ہو چکے ہیں۔ چوتھے آؤٹ ہونے والے بلے باز متھن تھے جنھیں رویندر جڈیجہ نے بہترین فیلڈنگ کا مظاہرہ کرتے ہوئے رن آؤٹ کیا۔ اس وقت لیٹن داس کا ساتھ محموداللہ دے رہے ہیں۔

اچھی شروعات کے بعد بنگلہ دیش کی بلے بازی لڑکھڑاتی ہوئی محسوس ہو رہی ہے۔ ایک طرف لیٹن داس سنچری کے قریب بلے بازی کر رہے ہیں اور دوسری طرف ایک کے بعد ایک وکٹ گرنے کا سلسلہ جاری ہے۔ تیسرے وکٹ کی شکل میں مشفق الرحیم محض 5 رن بنا کر آؤٹ ہو گئے۔ انھیں بھی کیدار جادھو نے کیچ آؤٹ کرایا۔

لیٹن داس کی بہترین بلے بازی کی وجہ سے بنگلہ دیش نے 25 اوور میں 133 رن بنا لیے ہیں۔ دوسری طرف مہدی حسن میراز اور امرالقیس آؤٹ ہو چکے ہیں جس کی وجہ سے رن ریٹ کی رفتار کچھ کم ہو گئی ہے۔ لیکن لیٹن داس بے خوف بلے بازی کر رہے ہیں۔ انھوں نے 74 گیندوں میں 92 رن بنا لیے ہیں۔ دوسری طرف مشفق الرحیم 5 گیند پر 4 رن بنا کر کھیل رہے ہیں۔

چہل نے امرالقیس کو ایل بی ڈبلیو آؤٹ کر ہندوستان کو دوسری کامیابی بہت جلدی دلا دی ہے۔ اس وکٹ سے ہندوستانی ٹیم میں جوش کا ماحول دیکھنے کو مل رہا ہے اور بنگلہ دیش خیمہ میں مایوسی کا عالم ہے۔ امرالقیس محض 2 رن بنا سکے۔

کیدار جادھو نے ہندوستان کو پہلی کامیابی دلاتے ہوئے مہدی حسن میرزا کو 32 رن پر آؤٹ کر دیا۔ مہدی حسن نے 32 رن 59 گیندوں پر بنائے۔ کیدار جادھو نے انھیں امباتی رائیڈو کے ہاتھوں کیچ کرایا۔ اب لیٹن داس کا ساتھ دینے کے لیے امرالقیس میدان پر آئے ہیں۔

بنگلہ دیش نے 20 اوور ختم ہونے کے بعد 116 رن بنا لیے ہیں۔ ظاہری طور پر بنگلہ دیش کا رَن ریٹ 6 رن فی اوور سے کم ہے لیکن ان کے بلے باز کافی سمجھداری سے بلے بازی کر رہے ہیں۔ لیٹن داس جہاں ایک طرف جارحانہ رخ اختیار کیے ہوئے ہیں وہیں دوسری طرف مہدی حسن میرزا محتاط بلے بازی کر رہے ہیں۔ اس وقت لیٹن داس 65 گیند میں 85 اور مہدی حسن میرزا 55 گیند میں 29 رن بنا کر ناٹ آؤٹ ہیں۔ ابھی تک ہندوستان نے پانچ گیندبازوں کا استعمال کیا ہے اور کسی کو کامیابی حاصل نہیں ہوئی ہے۔ رویندر جڈیجہ اور کلدیپ یادو نے 5-5 اوور کیے ہیں جب کہ بمراہ اور بھونیشور کمار نے 4-4 اوور کیے ہیں۔ یجوویندر چہل نے 2 اوور ڈالے ہیں۔

بنگلہ دیش کے بلے بازوں نے حیرت انگیز طریقے سے اپنے 100 رن مکمل کر لیے ہیں اور ابھی تک کوئی وکٹ نہیں گنوایا ہے۔ وکٹ لینے کی ہندوستانی گیندبازوں کی ہر کوشش کو لیٹن داس اور مہدی حسن میراز ناکام بنا دے رہے ہیں۔ بنگلہ دیش نے 100 رن 18ویں اوور میں مکمل کیا۔ اس وقت لیٹن داس 73 رن بنا کر کھیل رہے ہیں اور انھوں نے ہی جب بنگلہ دیش کا اسکور 98 رن تھا تو چوکا مار کر 100 رن مکمل کیا۔

بنگلہ دیش کے سلامی بلے بازوں نے زبردست بلے بازی کا مظاہرہ کرتے ہوئے 15 اوور کے بعد 86 رن بنا لیے ہیں اور اچھی بات یہ ہے کہ ان کا ابھی تک کوئی وکٹ نہیں گرا ہے۔ لیٹن داس نے شروع سے ہی جارحانہ رخ اختیار کر رکھا ہے اور انھوں نے اپنی نصف سنچری بھی مکمل کر لی ہے۔ اس وقت لیٹن داس 41 گیند میں 59 رن بنا کر کھیل رہے ہیں۔ دوسری طرف مہدی حسن میراز سنبھل کر کھیل رہے ہیں اور انھوں نے 49 گیند میں 25 رن بنائے ہیں۔

بنگلہ دیشی بلے بازوں نے ہندوستانی گیندبازوں پر تیزی کے ساتھ رن بنانا جاری رکھا ہے اور 10 اوور میں بغیر کوئی وکٹ گنوائے 65 رن بنا لیے ہیں۔ لیٹن داس پوری طرح جارحانہ نظر آ رہے ہیں اور انھوں نے بمراہ کے بعد یجویندر چہل کی گیندوں پر بھی کئی زوردار شاٹس لگائے۔ چہل کے دوسرے اوور میں تو لیٹن داس نے 2 بہترین چھکّے مارے۔ لیٹن اس وقت 31 گیند میں 47 رن بنا کر کھیل رہے ہیں۔ دوسری طرف مہدی حسن میراز 29 گیندوں پر 16 رن بنا کر کھڑے ہیں۔

ایشیا کپ کے فائنل میں ہندوستان کے خلاف پہلے بلے بازی کرتے ہوئے بنگلہ دیش نے بہترین شروعات کی ہے۔ پہلے 5 اوور میں اس نے بغیر کوئی وکٹ گنوائے 33 رن بنا لیے ہیں۔ لیٹن داس 18 گیند میں 22 رن بنا کر اور 12 گیند میں 9 رن بنا کر کھیل رہے ہیں۔ ہندوستان کی جانب سے گیندبازی کی شروعات جسپریت بمراہ اور بھونیشور کمار نے کی۔ بمراہ نے اب تک 3 اوور میں 15 رن دیے ہیں جب کہ بھونیشور نے 2 میں 17 رن خرچ کیے۔

متحدہ عرب امارات میں 6 ٹیموں کے درمیان جاری ایشیا کپ 2018 کا آج فائن میچ ہے اور یہ ہندوستان اور بنگلہ دیش کے درمیان دبئی میں کھیلا جا رہا ہے۔

ایشیا کپ ٹورنامنٹ کے فائنل میچ میں ہندوستان نے بنگلہ دیش کے خلاف ٹاس جیت کر پہلے فیلڈنگ کا فیصلہ کیا ہے۔ ہندوستانی کپتان روہت شرما نے کے وقت کہا کہ ہم ٹورنامنٹ میں لگاتار ہدف کا تعقب کر ہے ہیں، آج یہ آخری میچ ہے اس میں بھی ہم ہدف کا تعاقب ہی کرنا چاہیں گے۔۔ادھر، بنگلہ دیشی کپتان کا کہنا ہے کہ وہ محنت کر کے فائنل میں پہنچیں ہیں، بڑا سکور کرکے دفاع کرنے کی کوشش کریں گے۔ ہندوستان اس سے قبل 6 مرتبہ ایشیا کپ جیت چکا ہے جبکہ بنگلہ دیش دوسری مرتبہ فائنل میں پہنچا ہے۔

ہندوستان کی ٹیم: روہت شرما، شکھر دھون، امباتی رائیڈو، دنیش کارتک، ایم ایس دھونی، کیدار جادھو، روندر جڈیجا، بھونیشور کمار، یجویندر چہل، کلدیپ یادو اور جسپریت بومرا۔