ملکارجن کھڑگے، تصویر @INCIndia
کانگریس صدر ملکارجن کھڑگے نے آج اتر پردیش کے ان دو پارلیمانی حلقوں کا دورہ کیا جو اس وقت سب سے زیادہ سرخیوں میں ہیں۔ یعنی امیٹھی اور رائے بریلی۔ دونوں ہی پارلیمانی حلقوں میں جلسۂ عام سے خطاب کرتے ہوئے کھڑگے نے مرکز کی مودی حکومت کو شدید تنقید کا نشانہ بنایا اور کانگریس لیڈر راہل گاندھی کی تعریفوں کے پل باندھے۔ امیٹھی میں تو انھوں نے ایک بڑا اعلان کرتے ہوئے کہا کہ ’’انڈیا اتحاد کی حکومت لوگوں کو ہر مہینے 10 کلو اناج دے گی۔‘‘ یعنی ابھی مودی حکومت جو 5 کلو اناج غریبوں کو دے رہی ہے، کانگریس نے اسے دوگنا کرنے کا وعدہ عوام سے کیا ہے۔
Published: undefined
آج ملکارجن کھڑگے نے پہلے رائے بریلی کا دورہ کیا جہاں لوگوں کی زبردست بھیڑ سے خطاب کرتے ہوئے کہا کہ ’’یہ بہت ہی اہم انتخاب ہے۔ یہ ملک کے مستقبل کو بنانے والا انتخاب ہے۔ اس ملک کے دلت، پسماندہ، قبائلی، غریب اور کسانوں کو بچانے والا انتخاب ہے۔ اگر اس میں کوئی غلطی ہو گئی تو ملک میں آئین کا راج بند ہو جائے گا۔‘‘ وہ مزید کہتے ہیں کہ ’’نریندر مودی منمانی سے حکومت چلاتے ہیں۔ ان کے اندر بہت تکبر پیدا ہو گیا ہے۔ اس لیے ایک بات طئے ہو گئی ہے– انڈیا اتحاد جیتنے والا ہے، بی جے پی اقتدار سے باہر جانے والی ہے۔‘‘
Published: undefined
کانگریس کے سابق صدر راہل گاندھی کی تعریف کرتے ہوئے موجودہ صدر کھڑگے نے کہا کہ ’’راہل گاندھی رائے بریلی کے شیر ہیں، غریبوں کے لیے لڑنے والے سپاہی ہیں۔ رائے بریلی کو فیروز گاندھی جی سے لے کر اندرا گاندھی جی، سونیا گاندھی جی، سبھی نے سنبھالا ہے۔ اب راہل جی سنبھال رہے ہیں۔‘‘ گاندھی فیملی کی قربانیوں کا بھی تذکرہ کھڑگے نے اپنی تقریر کے دوران کیا۔ انھوں نے کہا کہ ’’گاندھی فیملی اقتدار کے لیے نہیں لڑ رہی ہے۔ اگر اقتدار کے لڑتی تو 2009-2004 میں سونیا گاندھی جی ملک کی وزیر اعظم بن جاتیں۔ لیکن انھوں نے کہا تھا ’میں وزیر اعظم نہیں بننا چاہتی، مین صرف ملک کی خدمت کرنا چاہتی ہوں۔‘ لیکن آج ملک میں اقتدار کے لیے لڑنے والے لوگ دکھائی دے رہے ہیں۔‘‘
Published: undefined
رائے بریلی کے بعد کھڑگے نے امیٹھی کا دورہ کیا جہاں انھوں نے جلسۂ عام سے خطاب کرتے ہوئے رائے بریلی اور امیٹھی میں کانگریس کے کیے گئے کاموں کو یاد کیا۔ انھوں نے کہا کہ ’’کانگریس حکومت نے رائے بریلی اور امیٹھی میں بہت سارے کام کیے ہیں۔ ضلع اسپتال لال گنج بنا، ریل کوچ فیکٹری بنی، این ٹی پی سی اونچاہار بنا، ایمس بنا، اسپائس پارک بنا، شاردا نہر بنی، گنگا برج بنا، راجیو گاندھی پٹرولیم انسٹی ٹیوٹ بنا، نیشنل فلائنگ اکیڈمی بنی، این آئی ایف ٹی بنا، ایف ڈی ڈی آئی بنا۔‘‘ پھر کھڑگے نے وزیر اعظم سے سوال کیا کہ ’’پی ایم مودی، آپ نے کیا بنایا؟‘‘
Published: undefined
ملکارجن کھڑگے نے وزیر اعظم مودی پر حملہ آور رخ اختیار کرتے ہوئے کہا کہ ’’نریندر مودی عوام کو گمراہ کرنے والے راجہ ہیں۔ یہ صرف عمارتوں اور منصوبوں کے نام بدل سکتے ہیں، کوئی کام نہیں کر سکتے۔‘‘ اس موقع پر کانگریس صدر نے امیٹھی سے کانگریس امیدوار کشوری لال شرما کی جیت یقینی قرار دیتے ہوئے کہا کہ ’’امیٹھی میں کشوری لال شرما جی کی طرف سے یہ انتخاب خود عوام لڑ رہی ہے۔ جب عوام خود لڑتی ہے تو کامیابی یقینی ہو جاتی ہے۔‘‘
Published: undefined
Follow us: Facebook, Twitter, Google News
قومی آواز اب ٹیلی گرام پر بھی دستیاب ہے۔ ہمارے چینل (qaumiawaz@) کو جوائن کرنے کے لئے یہاں کلک کریں اور تازہ ترین خبروں سے اپ ڈیٹ رہیں۔
Published: undefined