ایران اسرائیل تنازعہ: ہندوستان کی اپنے شہریوں کو ایران کا سفر نہ کرنے کی صلاح

ایران اور اسرائیل کے مابین حالیہ تنازعے کے باعث بھارتی حکومت نے اپنے شہریوں کو ایران کا سفر کرنے سے اجتناب کرنے کی صلاح جاری کی ہے۔ یہ قدم اس وقت اٹھایا گیا جب ایران نے اسرائیل پر سینکڑوں میزائلوں داغے، جس کے بعد اسرائیل نے اپنے ایئر ڈیفنس سسٹم کے ذریعے متعدد میزائلوں کو ناکام کر دیا۔

ہندوستانی وزارت خارجہ نے اس صورتحال کے بعد اپنے شہریوں کو ایران کے غیر ضروری سفر سے بچنے کی صلاح دی ہے۔ وزارت نے مزید کہا کہ جو لوگ ایران میں موجود ہیں وہ تہران میں ہندوستانی سفارت خانے کے ساتھ رابطے میں رہیں اور محتاط رہیں۔

وزارت خارجہ کے ترجمان رندیپ جیسوال نے سوشل میڈیا پلیٹ فارم 'ایکس' پر اس کی اطلاع دیتے ہوئے لکھا، ’’ہم علاقے میں حالیہ سیکورٹی صورتحال پر گہری نظر رکھے ہوئے ہیں۔ ہندوستانی شہریوں کو ایران کے غیر ضروری سفر سے اجتناب کرنے کا مشورہ دیا جاتا ہے۔ اس وقت ایران میں مقیم ہندوستانی شہریوں سے گزارش ہے کہ وہ محتاط رہیں اور تہران میں ہندوستانی سفارتخانے سے رابطے میں رہیں۔‘‘

یہ صورتحال لبنان میں حزب اللہ کے سربراہ حسن نصراللہ کی موت کے بعد سے پیدا ہوئی ہے، جس کے بعد سے ایران اور اسرائیل کے مابین تناؤ میں مزید اضافہ ہو چکا ہے۔

ایران نے اعلان کیا کہ یہ حملہ اسرائیلی کارروائیوں کا جواب ہے۔ اسرائیلی میڈیا نے تصدیق کی کہ ایران نے تقریباً 180 بیلسٹک میزائل اسرائیل کی جانب داغے، جبکہ اسرائیلی ڈیفنس فورس نے ان میں سے ایک بڑی تعداد کو فضا میں ہی تباہ کر دیا۔

امریکہ نے اس تنازعے میں اسرائیل کی حمایت کا اعلان کیا ہے اور اگر اسرائیل مزید جوابی کارروائی کرتا ہے تو اس کی حمایت جاری رکھنے کا وعدہ کیا ہے۔