امر جوان جیوتی کو بجھانا ان بہادروں کی ہمت اور قربانی کی توہین ہے ، کانگریس

انڈیا گیٹ پر امر جوان جیوتی کی لو کو آج سہ پہر ایک عظیم فوجی تقریب میں نو تعمیر قومی جنگی یادگار میں ضم کر دیا گیا۔ ایئر مارشل بل بھدر رادھا کرشنا نے تقریب کی صدارت کی۔ شہید فوجیوں کے اعزاز میں روشن کی گئی اس لو کے انضمام کی سیاسی مخالفت بھی ہوئی۔

اس دوران یوتھ کانگریس نے قومی جنگی یادگار میں امر جوان جیوتی کی لو کو ضم کرنے پر احتجاج کیا۔کانگریس نے ملک کے لیے جان دینے والے فوجیوں کی یاد میں جلائی جانے والی امر جیوتی کو بجھانے کے حکومت کے اقدام کو افسوس ناک قرار دیتے ہوئے کہا کہ کانگریس دوبارہ امر جوان جیوتی کو جلائے گی۔

کانگریس کے سابق صدر راہل گاندھی نے ٹویٹ کیاکہ یہ بہت افسوسناک ہے کہ وہ امر جیوتی جو ہمارے بہادر سپاہیوں کے لیے جلتی تھی، آج بجھادی گئی۔ کچھ لوگ حب الوطنی اور قربانی کو نہیں سمجھ سکتے۔ کوئی بات نہیں… ہم ایک بار پھر اپنے سپاہیوں کے لیے امر جوان جیوتی روشن کریں گے۔

ِاس سے قبل پارٹی نے اپنے ہینڈل پر کہاکہ امر جوان جیوتی کو بجھانا ان بہادروں کی ہمت اور قربانی کی توہین ہے جنہوں نے 1971 کی جنگ میں پاکستان کو دو ٹکڑے کر دیے تھے۔ کوئی بھی محب وطن بی جے پی کی بہادری کی تاریخ کو مٹانے کی سازش کو برداشت نہیں کرے گا۔ مودی حکومت کا شہیدوں کی توہین کا یہ رویہ انتہائی ناگوار ہے۔

کانگریس کے شعبہ نشریات کے سربراہ رندیپ سنگھ سرجے والا نے کہاکہ مجاہدین آزادی اور ملک کی سلامتی میں شہید ہونے والے لاکھوں سورماؤں کے درمیان کوئی جھگڑا یا مقابلہ نہیں ہو سکتا۔ِ یہ بحث چھیڑنا فضول اور افسوسناک ہے، کیونکہ ماں بھارتی کے لیے ہر ایک کا تعاون انمول اور انمٹ ہے۔ شہیدوں اور جانبازوں کی قربانیوں کی علامت 'امر جوان جیوتی کی چمک نیتا جی سبھاش چندر بوس کے مجسمے سے مزید مزین ہوتی۔ آزاد ہند فوج اور آزاد ہندوستان کے سپاہیوں کی قربانیوں کی خوشبو مل کر ملک کی آب و ہوا کو مزید مہکائے گی۔

انڈین یوتھ کانگریس کے قومی صدر سری نواس بی وی نے کہا کہ یہ بہت افسوسناک ہے کہ حکومت یہ دلیل دے رہی ہے کہ یہ فیصلہ بجٹ کی تنگی کی وجہ سے کیا گیا ہے، ہمارے بہادر سپاہیوں کے لیے امر جیوتی جلتی تھی، اگر آپ ہزاروںکروڑ کی مالیت کا ہوائی جہاز خرید سکتے ہیں۔ کیا آپ شہداء کے لیے جیوتی جلانے کے لیے بجٹ نہیں بنا سکتے؟ بی جے پی حکومت حب الوطنی اور قربانی کو کبھی نہیں سمجھے گی۔ انہوں نے یہ بھی کہا کہ کانگریس پارٹی مستقبل میں ملک کے سپاہیوں کے لیے ایک بار پھر امر جوان جیوتی روشن کرے گی۔

تقریبات کا آغاز انڈیا گیٹ پر یک سنگی طور پر روشن لو سے ہوا۔ وہاں ایک سپاہی نے امر جوان جیوتی کی لو سے دوسرے سپاہی کے ہاتھ میں مشعل روشن کی اور اسے نک پریڈ کے ساتھ قومی جنگی یادگار پر امر جوان ستون کی لو تک لے جایا گیا۔

ملک کے لیے اپنی جانیں قربان کرنے والے بہادر سپاہیوں کے اعزاز میں ایئر مارشل بل بھدر رادھا کرشنا نے قومی شہیدوں کی یادگار کے امر جوان ستون پر گل دائرہ پیش کیا اور امر جوان جیوتی سے لایا گئی لو کو میموریل کی لو میں ضم کردیا۔

آرمی، بحریہ اور فضائیہ کے جوانوں کے دستے نے نیشنل وار میموریل پر بگل بجا کر لو کو سلامی دی۔ واضح ر ہے کہ نیشنل وار میموریل پر تقریباً 26000 شہید فوجیوں کے نام کندہ ہیں۔