کیرالہ میں دودھ 6 روپے فی لیٹر ہوا مہنگا

ترواننت پورم: ڈیری فارمرز کی بڑھتی ہوئی لاگت کو پورا کرنے کے لئے، کیرالہ کوآپریٹو دودھ مارکیٹنگ فیڈریشن ( کے سی ایم ایم ایف) نے جمعرات  یعنی یکم دسمبر سے دودھ کی قیمت میں 6 روپے فی لیٹر کا اضافہ کیا ہے۔ ملما کے صدر کے ایس منی نے یہ اطلاع دی۔ کے ایس منی نے کہا کہ نظرثانی کے مطابق 500 ملی لیٹر ڈبل ٹونڈ دودھ کی قیمت 24 روپے، نان ہوموجنائزڈ ٹونڈ دودھ 25 روپے، ہوموجنائزڈ ٹونڈ دودھ 26 روپے، ہوموجنائزڈ ٹونڈ دودھ 28 روپے، 500 ملی لیٹر معیاری دودھ 29 روپے اور 520 ایم ایل پرائیڈ دودھ 28 روپے کا ہے۔

میڈیا سے خطاب کرتے ہوئے کے ایس منی نے کہا کہ قیمتوں میں 83.75 فیصد اضافہ کسانوں کو دیا جائے گا۔ یعنی ایک لیٹر دودھ پر چھ روپے کے اضافے میں سے 5.025 روپے کسان کو ملیں گے۔ اس کے علاوہ ویلفیئر فنڈ میں 0.75 پیسے دیئے جائیں گے۔ دودھ کوآپریٹیو اور ڈیلروں کو بڑھی ہوئی قیمت کا 5.75 فیصد (0.345 روپے) ملے گا۔ 3.5 فیصد (0.21 روپے) فیڈریشن کو اور 0.5 فیصد (0.03 روپے) پلاسٹک کے خاتمے کے پروگرام میں جائیں گے۔

کے ایس منی نے کہا کہ جہاں کسانوں کو قیمتوں میں نظرثانی سے زیادہ تر فائدہ ہوگا، وہیں دودھ کوآپریٹیو اور ڈیلروں کو بھی اس فیصلے سے فائدہ ہوگا۔ انہوں نے کہا کہ ڈیری سیکٹر گزشتہ چند سالوں سے انتہائی مشکل دور سے گزر رہا ہے۔ ڈیری کے چیئرمین نے کہا کہ 2019 کے بعد اب دودھ کی قیمتوں میں اضافہ کیا جا رہا ہے۔ سال 2019 میں 4 روپے فی لیٹر کا اضافہ کیا گیا جس میں سے 3.35 روپے کسانوں کو دیئے گئے۔

انہوں نے کہا کہ یکم نومبر سے مویشیوں کے چارے کی قیمتوں میں 12 فیصد اضافہ ہوا ہے۔ خام مال کی قیمتوں میں اضافے کی وجہ سے جانوروں کا چارہ تیار کرنے والی فیکٹریاں اپنی حتمی مصنوعات کی قیمتوں میں اضافہ کیے بغیر کام نہیں کر سکتیں۔ مویشیوں کے چارے کی فیکٹریوں کو رواں مالی سال کے دوران 18 کروڑ روپے کا نقصان ہوا ہے۔ اس کے علاوہ دیگر ریاستوں سے کیرالہ میں دودھ کی آمد میں کمی آئی ہے۔

کے ایس منی نے کہا کہ حکومت کی جانب سے تشکیل کردہ پینل کے مطالعہ کی بنیاد پر ملما اور کے ایف ایل مویشیوں کے چارے کی قیمتوں میں اضافہ کیا گیا ہے۔ حکومت نے ایس ایل بی پی اسکیم کے تحت مویشیوں کے چارے کی قیمت میں بھی اضافہ کیا۔