اکھنور مقابلے میں ہندوستانی فوج کے بہادر کتے 'فینٹم' کی موت، ایک دہشت گرد بھی مارا گیا

ہندوستانی  فوج کا کتا فینٹم پیر یعنی 28 اکتوبر کی صبح سندربنی سیکٹر میں آسن کے قریب فوجی قافلے پر دہشت گردوں کی فائرنگ سے جان کی بازی ہار گیا۔ وائٹ نائٹ کور نے فوج کے کتے کی ہلاکت کی اطلاع دی ہے۔

وائٹ نائٹ کور نے ٹویٹ کیا، "جب ہمارے دستے پھنسے ہوئے دہشت گردوں پر قابو پا رہے تھے، فینٹم دشمن کی فائرنگ کی زد میں آ گیا جس کے نتیجے میں اسے مہلک زخم آئے۔ اس کی ہمت، وفاداری اور لگن کو کبھی فراموش نہیں کیا جائے گا۔ آپریشن میں ایک دہشت گرد مارا گیا ۔"

وائٹ نائٹ کور نے ٹویٹر پر لکھا، "ہم اپنے حقیقی ہیرو کی عظیم قربانی کو سلام پیش کرتے ہیں - ایک بہادر ہندوستانی فوج کے کتے، فینٹم" کو۔ یہ بیلجیئم کا میلینوئی کتا تھا، جو 25 مئی 2020 کو پیدا ہوا تھا۔ فوج کا مزید کہنا تھا کہ جاری آپریشن میں ایک دہشت گرد مارا گیا ہے اور اب تک جنگی مواد برآمد کیا گیا ہے۔‘‘

حکام نے بتایا کہ پیر کی صبح دہشت گردوں نے جموں خطے کے اکھنور سیکٹر میں فوج کے ایک قافلے پر فائرنگ کی، جس میں ایک ایمبولینس کو نشانہ بنایا گیا۔ اس کے بعد اسپیشل فورسز نے آپریشن شروع کیا، جس میں ایک حملہ آور مارا گیا۔

اس سے پہلے دن میں جموں و کشمیر پولیس نے کہا تھا کہ جموں و کشمیر میں اکھنور کے بٹل علاقے میں آسن مندر کے قریب تین دہشت گردوں کو دیکھا گیا تھا۔ ان میں سے ایک دہشت گرد مارا گیا ہے، جب کہ دو کی تلاش جاری ہے۔