بہار کے موتیہاری میں زہریلی شراب پینے سے 8 افراد کی موت، 25 داخل اسپتال

پٹنہ: بہار کے موتیہاری میں زہریلی شراب پینے سے 8 افراد کی موت کی خبر ہے، جبکہ دیگر 25 افراد کو علاج کے لیے اسپتال میں داخل کرایا گیا ہے۔ رپورٹ کے مطابق زہریلی شراب سے اموات کا یہ سانحہ لکشمی پور پہاڑور، ہرسدھی میں پیش آیا۔ جن 25 افراد کی طبیعت خراب ہے ان کا علاج صدر اسپتال میں چل رہا ہے۔ بہار میں اس سے قبل بھی زہریلی شراب پینے سے متعدد افراد ہلاک ہو چکے ہیں، جبکہ ریاست میں شراب نوشی ممنوع قرار دی گئی ہے۔

معاملہ سامنے آنے کے بعد پولیس اور انتظامیہ ایکشن میں ہے۔ واقعہ کو سنجیدگی سے لیتے ہوئے ضلع مجسٹریٹ سوربھ جوروال نے تحقیقات کا حکم دیا ہے۔ صدر اور اریراج کے سب ڈویژنل افسران متاثرہ دیہات کا دورہ کر کے حالات کا جائزہ لے رہے ہیں۔ رپورٹ کے مطابق کئی متاثرہ افراد بینائی سے بھی محروم ہو گئے ہیں۔

بہار کے سارن ضلع میں گزشتہ سال زہریلی شراب پینے سے 40 افراد کی موت ہو گئی تھی۔ اس معاملہ پر قومی انسانی حقوق کمیشن نے ایک رپورٹ کے ذریعے نتیش حکومت کو مورد الزام ٹھہرایا تھا۔ جس کے بعد ریاست کی حزب اختلاف کی جماعت بی جے پی نتیش حکومت پر حملہ آور ہو گئی تھی۔