اسمبلی انتخابات سے قبل بی جے پی کو جھٹکا، کمل ناتھ کی موجودگی میں کانگریس میں شامل ہوئے دیپک جوشی

بھوپال: مدھیہ پردیش کے سابق وزیر اعلیٰ اور باگلی اسمبلی حلقہ انتخاب سے 8 مرتبہ کے رکن اسمبلی، رکن پارلیمنٹ کیلاش جوشی کے بیٹے دیپک جوشی نے آج کانگریس میں شمولیت اختیار کر لی۔ انہوں نے اپنے ہمنواؤں کے ساتھ مدھیہ پردیش کانگریس کے صدر کمل ناتھ کی رہائش گاہ پہنچ کر کانگریس میں شمولیت اختیار کی۔

اس دوران دیپک جوشی کے ہاتھ میں اپنے والد کیلاش جوشی کی تصویر تھی۔ دیپک جوشی نے ایک سادہ سی تقریب کے دوران کانگریس میں شمولیت اختیار کر لی۔ دیپک جوشی کے اس فیصلے کو کانگریس کی بڑی جیت اور بی جے پی کے لیے جھٹکا قرار دیا جا رہا ہے۔ دیپک نے جمعہ کے روز اعلان کیا تھا کہ وہ بی جے پی کو چھور کر کانگریس میں شامل ہونے جا رہے ہیں۔

مدھیہ پردیش حکومت میں وزیر رہ چکے دیپک جوشی اپنے ساتھیوں کے ساتھ مدھیہ پردیش کانگریس کے صدر اور سابق وزیر اعلیٰ کمل ناتھ کی رہائش گاہ پہنچے۔ انہوں نے ایک سادہ تقریب میں کانگریس میں شمولیت اختیار کی۔ دیپک جوشی گاڑیوں کے قافلے کے بغیر اور طاقت کا مظاہرہ کیے بغیر کمل ناتھ کی رہائش گاہ پہنچے۔

دیپک جوشی نے کانگریس کی رکنیت لینے سے پہلے جمعہ کو ایک پریس کانفرنس کا اہتمام کیا تھا۔ سابق وزیر نے کہا کہ وہ اپنے والد کا روایتی مکان بھی چھوڑ رہے ہیں اور اب وہ اپنے بہنوئی کے ساتھ بھوپال میں رہیں گے۔ انہوں نے کہا کہ ان کے والد بھوپال سے رکن پارلیمنٹ رہے لیکن کسی بھی مقام یا چیز کو ان کے نام سے منسوب نہیں کیا۔

انہوں نے کہا کہ ’’نظریہ کی کوئی بات نہیں ہے، جو پرورش کرے گا اب میں ان کے ساتھ رہوں گا۔ کمل ناتھ جی سے متاثر ہوں۔ انہوں نے صرف تین منٹ میں ہی والد کی یادگار کے لیے زمین دے دی تھی۔ بی جے پی نے 30 مہینے میں اس یادگار کو کھنڈر میں تبدیل کر دیا۔‘‘