بہار میں روزگار کی عدم موجودگی کے لیے نتیش کمار اور نریندر مودی ذمہ دار: راہل گاندھی

کانگریس کے سابق صدر راہل گاندھی نے آج انتخابی تشہیر کے دوران بہار حکومت پر تلخ حملے کیے۔ انھوں نے کہا کہ آج اگر بہار کا نوجوان بے روزگار ہے، اس کے پاس ملازمت نہیں ہے تو اس کے لیے وزیر اعلیٰ نتیش کمار قصوروار ہیں۔ انھوں نے کہا کہ بہار کے لوگ کام کی تلاش میں دہلی اور دوسرے میٹرو پولیٹن شہروں میں جاتے ہیں۔ آخر انھیں بہار میں کام کیوں نہیں ملتا؟ بہار میٹرو میں کام کیوں نہیں ملتا؟ اس لیے کیونکہ بہار میں میٹرو ہے ہی نہیں، اور اس کے لیے ذمہ دار نتیش کمار ہیں۔

راہل گاندھی آج مغربی چمپارن میں ایک انتخابی ریلی سے خطاب کر رہے تھے۔ انھوں نے پی ایم مودی اور وزیر اعلیٰ نتیش کمار پر بہار کے ساتھ دھوکہ کرنے کا الزام عائد کیا۔ انھوں نے کہا کہ ان دونوں نے بہار کی ترقی کے لیے کچھ نہیں کیا۔ راہل گاندھی نے کہا کہ ’’عام طور پر دسہرے کے موقع پر راون کا پُتلا جلایا جاتا ہے، لیکن اس سال پنجاب میں لوگوں نے دسہرے پر پی ایم مودی، امبانی اور اڈانی کا پُتلا نذر آتش کیا۔ اس کی وجہ کیا ہے؟ یہ بہت افسوس کی بات ہے کہ ملک کے پی ایم کے ساتھ ایسا ہو رہا ہے۔‘‘

راہل گاندھی نے کہا کہ بہار میں نہ تو ضروری ملازمتیں ہیں، نہ سہولیات ہیں۔ یہ سب عام لوگوں کا قصور نہیں ہے، یہ قصور وزیر اعلیٰ اور وزیر اعظم کا ہے۔ اس سے قبل آج صبح راہل گاندھی نے ٹوئٹ کے ذریعہ بہار کے لوگوں کو پہلے مرحلہ میں ووٹنگ کے لیے نیک خواہشات پیش کیں۔ انھوں نے لکھا ’’اس بار انصاف، روزگار، کسان-مزدور کے لیے آپ کا ووٹ ہو صرف مہاگٹھ بندھن کے لیے۔ بہار کے پہلے مرحلہ کی ووٹنگ کے لیے آپ سبھی کو نیک خواہشات۔‘‘

واضح رہے کہ بہار اسمبلی انتخاب میں پہلے مرحلہ کے لیے ووٹنگ کا عمل جاری ہے۔ پہلے دور میں 71 سیٹوں پر انتخاب ہو رہے ہیں۔ پہلے مرحلہ میں صبح ووٹنگ کی رفتار کچھ دھیمی ضرور تھی لیکن 1 بجے تک 31.54 فیصد ووٹ پڑنے کی خبریں سامنے آئیں۔ بہر حال، پہلے مرحلہ میں سابق وزیر اعلیٰ جیتن رام مانجھی اور نتیش حکومت کے 8 وزراء کی قسمت داؤ پر لگی ہوئی ہے۔