کورونا پروٹوکول کی پابندی نہ کی گئی تو نکاح نہیں پڑھائیں گے، شہر قاضی کا اعلان

مہوبہ: ملک بھر میں کورونا کے معاملوں میں اضافہ ہو رہا ہے اور اتر پردیش کا حال بھی کچھ علیحدہ نہیں ہے۔ مرکزی اور ریاستی حکومتیں تمام طرح کی رہنما ہدایات جاری کر رہی ہیں مگر یہ تبھی کارگر ہو سکتی ہیں جب عوام ان کی پاسداری کرے۔ اسی ضمن میں مہوبہ کے شہر قاضی نے کورونا کی تدابیر پر عمل کرانے کی غرض سے منفرد پہل کرتے ہوئے اعلان کیا ہے کہ کورونا پروٹوکول پر عمل نہ کیا گیا تو وہ نکاح نہیں پڑھائیں گے۔

شہرقاضی محمد آفاق نے یہاں کہا کہ کورونا وائرس کے بڑھتے معاملات اور اس دوران ہونے والے نکاح کے سلسلے میں عربیہ حنفیہ مدرسہ میں مسلم مذہبی رہنماوں کی ایک میٹنگ ہوئی، جس میں فیصلہ کیا گیا کہ نکاح میں اگر کورونا پروٹوکول کی پاسداری نہیں کی گئی تو نکاح نہیں پڑھایا جائے گا۔

انہوں نے دولہا اور دلہن دونوں طرف کے لوگوں سے اپیل کی ہے کہ نکاح میں کم سے کم لوگ شامل ہوں اور سادگی سے نکاح کرائیں۔ نکاح کے بعد ہونے والی ولیمہ کی تقریب میں بھی کم سے کم لوگوں کو مدعو کرنے کی اپیل کی گئی ہے۔