آئی سی ایم آر کی تحقیق: کووی شیلڈ اور کو ویکسین کا کاک ٹیل زیادہ موثر

نئی دہلی: انڈین کونسل آف میڈیکل ریسرچ (آئی سی ایم آر) کی ایک تحقیق سے انکشاف ہوا ہے کہ ویکسین کی ایک خوراک جو کہ ہندوستان میں تیار کی گئی ہے اور اس میں کووی شیلڈ و کو ویکسین دونوں کو ملایا گیا ہے وہ کورونا کے خلاف بہت موثر ہے اور یہ انسانوں کی قوت مدافعت کو مضبوط کرے گی۔

تحقیقی مقالہ، جس کا ابھی جائزہ لینا باقی ہے، میں کہا گیا ہے کہ 6 ماہ بعد اینٹی باڈی کے ردعمل میں کمزوری کے باوجود، جن لوگوں کو کووی شیلڈ کی پہلی خوراک اور 6 ہفتے بعد دوسری خوراک دی گئی تھی، ایسے لوگوں میں کوونا کے خلاف بہتر قوت مدافعت پائی گئی۔ وہ لوگ جنہوں نے صرف کووی شیلڈ یا صرف کو ویکسین لگوائی تھی ان کے مقابلہ ان لوگوں میں زیادہ قووت مدافعت پائی گئی جنہوں نے دونوں کا ہی نادانستہ طور پر ٹیکہ لگوایا لیا تھا۔

اس تحقیق کے لیے آئی سی ایم آر کے محققین نے اتر پردیش کے سدھارتھ نگر ضلع سے تعلق رکھنے والے ان لوگوں کا تجزیہ کیا جنہوں نے نادانستہ طور پر کورونا ویکسین کی پہلی خوراک کووی شیلڈ اور دوسری خوراک کوویکسین حاصل کی تھی۔ یہ معاملہ ضلع کے برہنی پرائمری ہیلتھ سنٹر میں سامنے آیا۔ 6 ماہ کی ٹیکہ کاری کے بعد ان لوگوں کی کورونا وائرس کے خلاف قوت مدافعت کا آئی سی ایم آر کے محققین نے مطالعہ کیا۔

تحقیق کے لیے تین گروپ بنائے گئے۔ ان میں سے ایک مکس اینڈ میچ ویکسین والا گروپ تھا، باقی دو نارمل ویکسینیشن والے گروپ تھے۔ اس تحقیق سے ہی پتہ لگا کہ مکس اینڈ میچ والے گروپ میں زیادہ قوت مدافعت پائی گئی۔