آئی اے ایس افسر سنجیو ہنس اور سابق رکن اسمبلی گلاب یادو منی لانڈرنگ کے معاملہ میں گرفتار

پٹنہ: انفورسمنٹ ڈائریکٹوریٹ (ای ڈی) نے ہفتہ کے روز انڈین ایڈمنسٹریٹو سروس (آئی اے ایس) افسر سنجیو ہنس اور سابق رکن اسمبلی گلاب یادو کو منی لانڈرنگ کے معاملے میں گرفتار کر لیا۔ سنجیو ہنس کو ای ڈی نے ان کی پٹنہ میں واقع سرکاری رہائش گاہ سے جبکہ گلاب یادو کو دہلی کے ایک ریزورٹ سے حراست میں لیا۔ اطلاعات کے مطابق یہ گرفتاری کروڑوں روپے کی بے نامی جائیدادیں خریدنے کے الزامات کے تحت کی گئی ہے۔ سنجیو ہنس 1997 کے بیچ کے آئی اے ایس افسر ہیں۔

ای ڈی کے مطابق سنجیو ہنس نے پنجاب کے علاقوں موہالی اور کسولی میں بے نامی جائیدادیں خریدی ہیں۔ ہنس اور یادو کے خلاف 14 ستمبر کو خصوصی ویجیلنس یونٹ (ایس وی یو) نے مقدمہ درج کیا تھا، جس میں ان کے اہل خانہ سمیت 14 افراد کو ملزم نامزد کیا گیا ہے۔ ذرائع کے مطابق ایس وی یو کی ٹیم مرکزی ایجنسیوں سے موصولہ معلومات کی جانچ کر رہی ہے اور جلد ہی مزید تفتیش کے لیے ان افراد کو حراست میں لینے کا ارادہ رکھتی ہے۔

یہ بھی بتایا گیا ہے کہ سنجیو ہنس کو اگست میں ان کے عہدے سے ہٹا کر ریاستی حکومت کے عمومی انتظامی ڈپارٹمنٹ میں منتقل کر دیا گیا تھا، جس کے بعد ای ڈی نے ان کی جائیدادوں پر چھاپے مارے۔ اس سے پہلے بھی ای ڈی نے ہنس اور گلاب یادو کے خلاف منی لانڈرنگ کی تحقیقات کے دوران بہار، دہلی اور پونے میں چھاپے مارے تھے۔

گلاب یادو کی گرفتاری کے حوالے سے معلوم ہوا ہے کہ وہ سنجیو ہنس کے قریبی ساتھی رہے ہیں اور دہلی میں ایک ریزورٹ سے ان کی گرفتاری عمل میں آئی۔ گلاب یادو پہلے راشٹریہ جنتا دل (آر جے ڈی) سے وابستہ تھے اور مدھوبنی کی جھنجھارپور سیٹ سے ایم ایل اے رہ چکے ہیں۔ حالیہ لوک سبھا انتخابات میں ان کو آر جے ڈی نے ٹکٹ نہیں دیا، جس کے بعد وہ بہوجن سماج پارٹی (BSP) کے ٹکٹ پر الیکشن لڑے لیکن کامیاب نہ ہو سکے۔

سنجیو ہنس اور گلاب یادو پر ماضی میں جنسی زیادتی کے الزامات بھی لگ چکے ہیں اور دونوں کے خلاف مقدمات بھی درج کرائے گئے تھے۔ گلاب یادو کی اہلیہ امبیکا یادو نے بھی مقامی سیاست میں اپنی جگہ بنا لی ہے اور ایم ایل سی منتخب ہو چکی ہیں، جبکہ ان کی بیٹی بندو یادو ضلع کونسل کی صدر ہیں۔