لوک سبھا انتخابات سے قبل رام مندر نہیں بنا تو خود سوزی کرلوں گا : مہنت پرمہنس

اجودھیا: اجودھیا واقع شری رام جنم بھومی پر مندر کی تعمیر کے سلسلے میں بھوک ہڑتال کرنے والے تپسوی چھاؤنی کے مہنت پرمہنس داس نے خبردار کیا ہے کہ اگر مرکزی حکومت نے لوک سبھا انتخابات سے پہلے رام مندر کی تعمیر نہیں کی تو وہ خودسوزی کرلیں گے۔ مسٹر داس نے ہفتہ کے روز اتر پردیش کے وزیر اعلی یوگی آدتیہ ناتھ سے ملاقات کرنے کے بعد اپنی رہائش گاہ پر صحافیوں سے بات چیت کرتے ہوئے کہا کہ ’’وزیر اعلی کی یقین دہانی کے بعد انہوں نے اپنی بھوک ہڑتال آج ختم کرلی ۔وزیر اعلی نے انار کا جوس پلا کر میری بھوک ہڑتال ختم کی اور کہا کہ رام مندر کا معاملہ اکیلے میرے بس کی بات نہیں ہے۔ اس لیے میں بہت جلد آپ کی ملاقات وزیر اعظم نریندر مودی سے کراوں گا اور اگر ضرورت پڑے گی تو صدر سے بھی ملنے کو تیار ہوں۔‘‘

مہنت کے مطابق مسٹر یوگی نے ان سے کہا ہے کہ ’’جب سے میں نے وزیر اعظم کو بتایا کہ اجودھیا میں مندر کی تعمیر کے سلسلے میں سنت بھوک ہڑتال کررہے ہیں، تو وہ بھی آپ سے ملنا چاہتے ہیں۔ ان سے ملنے کا وقت جلد ہی لے لیا جائے گا۔‘‘ پرمہنس داس مزید کہتے ہیں کہ ’’جب رات کے وقت انتظامیہ نے مجھے بھوک ہڑتال کی جگہ سے اٹھایا تو اس سے مجھے کافی تکلیف پہنچی۔ انتظامیہ نے مجھے یہاں سے رات میں 11.30 بجے لکھنؤ کے پی جی آئی اسپتال میں داخل کرا دیا۔ اس کے بعد بھی میں بھوک ہڑتال پر رہا۔ ڈاکٹروں نے زبردستی مجھے ڈرپ لگایا۔‘‘

سنت اس تعلق سے آگے بتاتے ہیں کہ ’’ڈاکٹروں کے مطابق میرے جسم کے حصے بہت کمزور ہو چکے ہیں۔ اگرمجھے اسپتال میں داخل نہ کرایا جاتا تو میں کوما میں جا سکتا تھا۔اجودھیا کے ممبر اسمبلی ویدپركاش گپتا مجھ سے برابر پی جی آئی میں ملتے رہے اور انہی کے ذریعے میری ملاقات اتر پردیش کے وزیراعلیٰ یوگی آدتیہ ناتھ سے ہوئی۔‘‘

مسٹر داس نے کہا کہ لوک سبھا انتخابات کے پہلے اگر مندر کی تعمیر نہ کی گئی تو وہ خودسوزی کرلیں گے۔ انہوں نے کہا کہ پہلے تو وہ مہاتما گاندھی کی طرز پر تحریک کریں گے اور اس کے بعد بھی حکومت نے اگر اجودھیا میں مندر کی تعمیر نہیں کرائی تو ان کے پاس یکم دسمبر سے پہلے-پہلے تحریک یا خودسوزی کے علاوہ کوئی چارہ نہیں رہ جائے گا کیونکہ بھگوان شری رام کا مندر مجھے جان سے بڑھ کر پیارا ہے۔