میں اپنا بیٹا آپ کے حوالے کر رہی ہوں، وہ کبھی آپ کو مایوس نہیں کرے گا: سونیا گاندھی

کانگریس کا قلعہ سمجھے جانے والے رائے بریلی میں جمعہ (17 مئی) کو انڈیا الائنس کے لیڈران کے تمام اہم لیڈران ایک ساتھ جمع ہوئے۔ اس موقع پر راہل گاندھی کے لیے منعقدہ انتخابی جلسہ عام سے خطاب کرتے ہوئے سونیا گاندھی نے رائے بریلی کے لوگوں سے نہایت جذباتی اپیل کی۔ انہوں نے کہا کہ میں اپنا بیٹا آپ لوگوں کے حوالے کر رہی ہوں، وہ کبھی آپ کو مایوس نہیں کرےگا۔

اس جلسۂ عام میں سونیا گاندھی کے ساتھ رائے بریلی لوک سبھا سے امیدوار راہل گاندھی، کانگریس کی جنرل سکریٹری پرینکا گاندھی اور سماجوادی پارٹی کے سربراہ اکھلیش یادو خصوصی طور پر شریک ہوئے۔ اس موقع پر خطاب کرتے ہوئے سونیا گاندھی نے کہا کہ اس بات کی مجھے بے انتہا خوشی ہے کہ مجھے ایک طویل عرصے بعد آپ کے درمیان آنے کا موقع ملا ہے۔ آپ نے مجھے بطور رکن پارلیمنٹ خدمات انجام دینے کا موقع دیا یہ میری زندگی کا سب سے بڑا اثاثہ ہے۔ ہمارے خاندان کی جڑیں یہاں کی مٹی سے 100 سال سے جڑی ہوئی ہیں، اندرا جی کے دل میں رائے بریلی کے لیے الگ ہی مقام تھا۔ ان کے دل میں آپ لوگوں کی بے پناہ محبت تھی۔

سونیا گاندھی نے کہا کہ میں نے راہل اور پرینکا کو وہی تعلیم دی ہے جو گاندھی خاندان نے مجھے دی تھی۔ وہ تعلیم یہ ہے کہ سب کی عزت کرو، کمزوروں کے حقوق کے لیے جس سے بھی لڑنا ہو اس سے لڑو، جدوجہد کی تمہاری جڑیں اور روایات مضبوط ہیں۔ انہوں نے کہا کہ میں اپنا بیٹا آپ کے حوالے کر رہی ہوں، جس طرح آپ نے مجھے اپنا تسلیم کیا، اسی طرح راہل گاندھی کو بھی اپنا بنا کر رکھنا۔ راہل آپ کو کبھی مایوس نہیں کرے گا۔