عرفان خان کے انتقال کی خبر سن کر میں حیران و ششدر ہوں: اشوک گہلوت

راجستھان کے وزیر اعلی اشوک گہلوت نے معروف فلم اداکار عرفان خان کے انتقال پر گہرے رنج و غم کا اظہار کرتے ہوئے کہا ہے کہ وہ ریاست کے ابھرتے ہوئے فنکاروں کے لئے ایک مثال رہیں گے۔ اشوک گہلوت نے ٹوئٹر پر افسوس ظاہر کرتے ہوئے کہا ' معروف اداکار عرفان خان کی اچانک موت کی خبر سن کر میں کافی حیران اور دکھی ہوں۔ ان کے خاندان، دوستوں اور مداحوں کے تئیں میری دلی ہمدردی ہے۔ خدا ان کو طاقت دے۔ انہوں نے مرحوم کی روح کے لئے بھی دعا کی۔

اشوک گہلوت نے کہا عرفان خان راجستھان کے سب سے باصلاحیت فنکاروں میں سے ایک تھے۔انہوں نے اپنی بے مثال اداکاری کی وجہ سے کامیابی حاصل کی۔ راجستھان کے تھیٹر فنکاروں اور ابھرتے ہوئے فنکاروں کے لئے وہ ہمیشہ مثال رہیں گے۔

واضح رہے کہ عرفان خان نے اپنے کیریئر کا آغاز جے پور سے کیا تھا۔یہاں کے رویندر پلیٹ فارم سے انہوں نے اپنے کیریئر کی طرف پہلا قدم بڑھایا تھا۔ ان کی پیدائش جے پور کے ایک کاروباری خاندان میں ہوئی تھی جو ٹونک کے قریب ایک گاؤں کے رہنے والے تھے۔