’میں روزانہ انسولین مانگ رہا ہوں، تہاڑ جیل انتظامیہ کے دونوں بیان جھوٹے‘، جیل سپرنٹنڈنٹ کو کیجریوال کا مکتوب

تہاڑ جیل میں بند دہلی کے وزیر اعلیٰ اروند کیجریوال کی ذیابیطس اور انسولین کی فراہمی و عدم فراہمی سے متعلق عام آدمی پارٹی اور بی جے پی آمنے سامنے ہیں۔ اسی درمیان وزیر اعلیٰ کیجریوال کا ایک بیان سامنے آیا ہے جس میں انہوں نے کہا ہے کہ وہ روزانہ جیل انتظامیہ سے انسولین مانگ رہے ہیں اور یہ کہ تہاڑ انتظامیہ سیاسی دباؤ میں جھوٹ بول رہی ہے۔

دراصل وزیر اعلیٰ کیجریوال نے جیل سپرنٹنڈنٹ کو ایک مکتوب لکھا ہے، جس میں انہوں نے جیل انتظامیہ پر جھوٹ بولنے کا الزام لگایا ہے۔ اپنے مکتوب میں کیجریوال نے لکھا ہے کہ ’’میں نے اخبار میں تہاڑ انتظامیہ کا بیان پڑھا۔ بیان پڑھ کر بہت دکھ ہوا، تہاڑ کے دونوں بیانات جھوٹے ہیں، میں روزانہ انسولین مانگ رہا ہوں۔ میں نے گلوکو میٹر کی ریڈنگ دکھائی اور بتایا کہ دن میں 3 بار شوگر بہت زیادہ ہو جا رہی ہے۔ شوگر 250 سے 320 کے درمیان جاتی ہے۔ ایمس کے ڈاکٹروں نے کبھی بھی نہیں کہا کہ فکر کرنے کی کوئی بات نہیں ہے۔ ایمس کے ڈاکٹروں نے کہا کہ وہ ڈیٹا اور ہسٹری دیکھنے کے بعد بتائیں گے۔ تہاڑ انتظامیہ سیاسی دباؤ میں جھوٹ بول رہی ہے۔‘‘

واضح رہے کہ آج ہی دہلی کی محکمہ تعمیرات عامہ کی وزیر آتشی نے ایک پریس کانفرنس میں مبینہ شراب پالیسی گھوٹالہ معاملے میں منی لانڈرنگ کی تفتیش کر رہی ای ڈی کی کارروائی پر سوالات اٹھائے ہیں۔ انہوں نے کہا ہے کہ کیجریوال نے راؤز ایونیو کورٹ میں درخواست دی تھی کہ وہ اپنے شوگر کے ماہر ڈاکٹر سے بات کرنے کے بعد دوبارہ انسولین لینا چاہتے ہیں، مگر کیجریوال کی اس درخواست کی ای ڈی اور تہاڑ جیل انتظامیہ نے عدالت میں مخالفت کی ہے۔

آتشی کے مطابق عدالت میں پیش ہونے والے ای ڈی اور تہاڑ کے وکیل نے کہا کہ کیجریوال کو ان کے ڈاکٹر سے ملنے کی اجازت نہیں دی جانی چاہیے۔ ہم کیجریوال کو انسولین نہیں لینے دیں گے اور یہ کہ کیجریوال کو انسولین کی ضرورت نہیں ہے۔ ایمس کے ڈاکٹر بہت ماہر ہیں، وہ بتائیں گے کہ اروند کیجریوال کو انسولین کی ضرورت ہے یا نہیں۔

اس سے قبل اتوار (21 اپریل) کو خبر آئی تھی کہ اروند کیجریوال کی بیوی سنیتا کیجریوال کی درخواست پر تہاڑ جیل انتظامیہ نے ویڈیو کانفرنسنگ کے ذریعے ڈاکٹر کے ساتھ دہلی کے وزیر اعلیٰ کا کنسلٹیشن کرایا۔ ایمس کے سینئر ذیابیطس کے ماہر ڈاکر کے علاوہ آر ایم او تہاڑ اور ایم او تہاڑ بھی ویڈیو کانفرنسنگ کے دوران موجود رہے۔ ڈاکٹر سی جی ایم (گلوکوز مانیٹرنگ سینسر) کا مکمل ریکارڈ اور کیجریوال کی طرف سے لی جانے والی خوراک و ادویات کی تفصیل حاصل کی۔ اس دوران اروند کیجریوال کی طرف سے نہ تو انسولین کا مسئلہ اٹھایا گیا اور نہ ہی ڈاکٹر نے انہیں استعمال کرنے کا مشورہ دیا تھا۔