حیدرآباد انکاؤنٹر: ’میری بچی کی روح کو اب سکون ملے گا‘

حیدر آباد میں اجتماعی عصمت دری اور قتل کی شکار ہوئی خاتون ویٹنری ڈاکٹر کے گھر والوں نے جمعہ کے روز کہا کہ ظالمانہ واقعہ انجام دینے والے سبھی چار ملزمین کے ساتھ جو کچھ بھی ہوا وہ ٹھیک تھا۔ ویٹنری ڈاکٹر کے والد کا کہنا ہے کہ پولس انکاؤنٹر میں سبھی ملزمین کے ہلاک ہو جانے کے بعد انھیں انصاف ملا گیا ہے۔ جمعہ کی علی الصبح انکاؤنٹر میں ملزمین کے ہلاک ہونے کی خبر ظلم کی شکار خاتون ڈاکٹر کے گھر والوں کے لیے سکون دینے والی تھی۔ یہ جان کر وہ خوش تھے کہ تلنگانہ پولس نے سبھی ملزمین کو اسی جگہ پر گولی ماری جہاں ان کی بیٹی کی 27 نومبر کو نہ صرف اجتماعی عصمت دری ہوئی تھی بلکہ اسے نذرِ آتش بھی کر دیا گیا تھا۔

حیدر آباد کے باہری علاقہ شمس آباد میں رہنے والے متاثرہ کے والد نے میڈیا سے بات چیت کرتے ہوئے اپنی خوشی کا اظہار کیا۔ انھوں نے کہا کہ ’’اس خبر سے مجھے سکون ملا ہے۔ تلنگانہ پولس اور ان سبھی لوگوں کا شکریہ جو مشکل گھڑی میں میرے ساتھ رہے۔ میری بچی کی روح کو اب سکون ملے گا۔‘‘ متاثرہ ویٹنری ڈاکٹر کے والد نے یہ بھی کہا کہ ’’مجھے میری بیٹی واپس نہیں ملے گا، لیکن اس سے ایک سخت پیغام ظالموں کے درمیان ضرور جائے گا۔ اس سے خوف پیدا ہوگا اور میری بیٹی کے ساتھ جو ہوا اسے دوبارہ کرنے کی ہمت جرائم پیشوں میں نہیں ہوگی۔‘‘

دہلی میں اجتماعی عصمت دری کی شکار ’نربھیا‘ کی ماں کا بھی رد عمل حیدر آباد پولس انکاؤنٹر کے بعد سامنے آیا ہے۔ انھوں نے کہا کہ ’’چاروں ملزمین کا انکاؤنٹر کرنے کے لیے حیدر آباد پولس کا شکریہ۔ اس سے بہترین انصاف کچھ ہو ہی نہیں سکتا تھا۔ وہ (ملزمین) اسی لائق تھے۔‘‘ وہ مزید کہتی ہیں کہ ’’ہم چاہتے ہیں کہ اب جلد سے جلد نربھیا کے قصورواروں کو بھی پھانسی کی سزا دی جائے۔ سزا میں تاخیر ہونے سے نظام قانون پر سوال کھڑے ہو رہے ہیں۔‘‘