عآپ کے سینکڑوں لیڈران و کارکنان کانگریس میں شامل، دہلی کانگریس صدر دیویندر یادو نے کیا استقبال

نئی دہلی: دہلی ریاستی کانگریس کمیٹی کے صدر دیویندر یادو نے آج شمال مشرقی دہلی سے عام آدمی پارٹی (عآپ) رکن پارلیمنٹ کے نمائندہ اسلام ملک کو ان کے سینکڑوں کارکنان کے ساتھ کانگریس پارٹی میں شامل کیا۔ انھوں نے سبھی کو کانگریس کا پٹکا پہنا کر کانگریس فیملی میں ان کا استقبال کیا۔ اس موقع پر سابق رکن اسمبلی حسن احمد اور علی مہندی بھی موجود تھے۔

اس موقع پر دیویندر یادو نے کہا کہ اسلام ملک اور ان کے حامیوں کے کانگریس میں شامل ہونے سے شمال مشرقی دہلی میں ہماری طاقت بڑھے گی، کیونکہ علاقہ میں ان کی بہت اہمیت رہی ہے، ان کے ساتھ بڑی تعداد میں مسلم سماج جڑا ہوا ہے۔ انہوں نے مزید کہا کہ لوک سبھا انتخاب کے بعد کانگریس کے نظریہ اور طریقۂ کار پر بھروسہ کر کے دوسری پارٹیوں کے کارکنان کا کانگریس پارٹی میں شمولیت کا سلسلہ جاری ہے، جس سے کانگریس کا کنبہ لگاتار بڑھ رہا ہے۔

اس درمیان دہلی کانگریس صدر نے عام آدمی پارٹی کے تیمار پور اسمبلی سکریٹری پروین سونکر کو بھی کانگریس پارٹی کی رکنیت دلائی۔ پارٹی میں شامل ہونے والوں نے کہا کہ وہ کانگریس کے نظریات، روایات، مثبت سوچ اور قومی صدر ملکارجن کھڑگے و عوامی ہیرو راہل گاندھی کی با اثر شخصیت سے بہت متاثر ہوئے ہیں۔ ساتھ ہی انھوں نے یہ بھی کہا کہ راہل گاندھی جس طرح عوامی حقوق کے لئے پارلیمنٹ سے سڑک تک جدوجہد کر رہے ہیں، اس سے متاثر ہو کر سبھی نے کانگریس پارٹی میں شمولیت اختیار کی ہے۔

دیویندر یادو نے کانگریس فیملی میں شامل ہونے والے تمام کارکنان اور لیڈران کا دل کی گہرائیوں سے استقبال کیا۔ انہوں نے کہا کہ کانگریس پارٹی کے نظریات، کانگریس صدر ملکارجن کھڑگے کی سربراہی اور عوامی لیڈر راہل گاندھی جی کی عوام کے لئے جدوجہد سے متاثر ہو کر ہی لوگ کانگریس فیملی سے جڑ رہے ہیں۔ خواب دکھانا اور اسے حقیقت میں تبدیل کرنے میں بڑا فرق ہوتا ہے۔ کانگریس پارٹی میں شامل ہونے والے لوگوں کو بی جے پی اور عام آدمی پارٹی نے دھوکہ دیا، جس کی وجہ سے ان کا بھروسہ ختم ہو گیا۔