ان دو پارٹیوں کا جھارکھنڈ میں سو فیصد اسٹرائیک ریٹ

جھارکھنڈ اسمبلی انتخابات 2024 میں لوک جن شکتی پارٹی (ایل جے پی آر) اور جنتا دل یونائیٹڈ (جے ڈی یو) کی کارکردگی شاندار رہی ہے۔ ایل جے پی آر اور جے ڈی یو نے اپنا سو فیصد اسٹرائیک ریٹ برقرار رکھا ہے۔ پارٹی نے جناردن پاسوان کو چترا اسمبلی سیٹ سے نامزد کیا تھا، جنہوں نے راشٹریہ جنتا دل (آر جے ڈی) کی رشمی پرکاش کو 18,401 ووٹوں سے شکست دی۔

اس جیت کے بعد ایل جے پی آر کے سربراہ چراغ پاسوان نے خوشی کا اظہار کرتے ہوئے کہا کہ یہ ان کے والد مرحوم رام ولاس پاسوان کا خواب تھا کہ پارٹی جھارکھنڈ کی بھی نمائندگی کرے۔ چترا کے عوام اور پارٹی کارکنان سے اظہار تشکر کرتے ہوئے انہوں نے کہا کہ مستقبل میں پارٹی کو دیگر ریاستوں میں بھی وسعت دی جائے گی۔

جھارکھنڈ اسمبلی انتخابات میں بی جے پی نے ریاست کی 81 میں سے 68 سیٹوں پر اپنے امیدوار کھڑے کیے تھے۔ اتحادی پارٹی اے جے ایس یو کو 10 سیٹیں ملی تھیں۔ جبکہ جے ڈی یو کو ایک سیٹ اور چراغ پاسوان کی ایل جے پی(رام ولاس )کو ایک سیٹ دی گئی تھی۔ 2019 میں بی جے پی نے اکیلے الیکشن لڑا تھا اور 79 امیدوار کھڑے کیے تھے جبکہ اے جے ایس یو نے 53 امیدواروں کا اعلان کیا تھا۔

یہ جیت ایل جے پی آر اور جے ڈی یو دونوں کے لیے اہم ہے، کیونکہ ایل جے پی آر پارٹی نے پہلی بار جھارکھنڈ میں اسمبلی الیکشن لڑا تھا ۔ اس سے پہلے، پارٹی نے بہار لوک سبھا 2024 میں بھی سو فیصد اسٹرائیک ریٹ کے ساتھ کارکردگی کا مظاہرہ کیا تھا۔ چترا اسمبلی سیٹ پر جناردن پاسوان نے 1,09,019 ووٹ حاصل کیے، جب کہ ان کے قریبی حریف رشمی پرکاش کو 90,618 ووٹ ملے۔ وہیں، جے ڈی یو کے سریو رائے کو جمشید پور ویسٹ سیٹ سے کل 103631 ووٹ ملے۔ انہوں نے کانگریس کے بننا گپتا کو 7863 ووٹوں سے شکست دی۔