بہار: نظم ونسق کی ابتر صورتحال پر اسمبلی میں آرجے ڈی کا زبردست ہنگامہ

پٹنہ: بہار اسمبلی میں آج راشٹریہ جنتادل ( آرجے ڈی) کے اراکین نے ریاست میں نظم ونسق کی خراب صورتحال کے سلسلے میں زبردست ہنگامہ کیا، جس کی وجہ سے ایوان کی کارروائی مقررہ وقت سے قبل ہی ملتوی کرنی پڑی۔

اسمبلی کی کارروائی شروع ہوتے ہی للت یادو نے ریاست میں نظم ونسق کی خراب صورتحال پر ایوان میں بحث کے لئے دیئے گئے تحریک التوا تجویز کو منظور کرنے کا مطالبہ کیا۔ اس پر اسمبلی اسپیکر وجے کمار چودھری نے کہا کہ اس طرح کی اطلاع کے لئے وقت مقرر ہے اس لئے اس موضوع کو اسی وقت اٹھانا چاہیے۔

ابھی وقفہ سولات ہے اور اس سے چلنے دیں۔ اسی دوران جنتادل یونائٹیڈ ( جے ڈی یو) کے رکن اسمبلی رتنیش سدا نے کہا کہ جب سے اسمبلی کا سیشن شروع ہوا ہے تب سے ہی اپوزیشن لیڈر ایوان میں نہیں آرہے ہیں۔

اسمبلی اسپیکر نے اس کے بعد سوالات و جوابات کا سلسلہ شروع کردیا۔ وقفہ سولاات و جواب ختم ہونے کے بعد اسمبلی اسپکر نے آرجے ڈی کے للت یادو اور دیگر کی جانب سے دی گئی تحریک التوا تجویز کو حسب ضابطہ نہیں پاتے ہوئے نامنظور کر دیا۔

یادو نے اس کے بعد تحریک التوا کی نوٹس پرھنے کی اجازت طلب کی۔ اس پر اسمبلی اسپیکر نے کہا کہ تحریک التوا نامنظور کیے جانے کے بعد نوٹس پڑھنے کا قانون نہیں ہے۔ اس کے باجود وہ اس کی اجازت دے رہے ہیں۔ اس کے بعد آرجے ڈی کے للت یادو نے کہا کہ بہار میں نظم ونسق کی صورتحال بے حد خراب ہے۔ ریاست میں کہیں کوئی محفوظ نہیں ہے۔ انہوں نے کہا کہ صرف دارالحکومت پٹنہ میں گذشتہ سات ماہ میں سترہ قتل کے واقعات رونما ہوئے ہیں اس لئے اس موضوع پر ایوان میں بحث ہونی ضروری ہے۔

اس پر اسمبلی اسپیکر نے کہا کہ یہ سیشن ابھی لمبا چلنے والا ہے اور اس دوران محکمہ داخلہ کے مطالبے پر بھی بحث ہونا ہے۔ اس لئے اس دن اراکین کو اس معاملے میں تفصیل سے بات کرنے کا موقع ملے گا۔ اسمبلی اسپیکر نے اس کے بعد وقفہ صفر کا نوٹس پڑھنے کے لئے اراکین کا نام پکارا لیکن آرجے ڈی کے اراکین نظم ونسق پر ایوان میں بحث کرانے کے مطالبے کو لیکر شورو غل کرنے لگے۔ شورو غل کے دوران ہی کچھ اراکین نے وقفہ صفر کا نوٹس پڑھا۔

اس کے بعد آرجے ڈی کے للت یادو، شیو چندر رام اور سریندر یادو کے ساتھ پارٹی کے دیگر اراکین اسمبلی ایوان کے بیچ میں آگئے اور حکومت کے خلاف نعرے بازی کرنے لگے۔ آرجے ڈی کے اراکین ” نظم ونسق ٹھیک کرو، چوری ڈکیتی بند کراﺅ اور لوگوں کو تحفظ دینا ہوگا “ جیسے نعرے لگارہے تھے۔

اسمبلی اسپیکر چودھری نے ہنگامہ کر رہے اراکین سے اپنی سیٹوں پر جانے کی درخواست کی لیکن وہ نہیں مانے۔ بعد میں اسمبلی اسپکر نے ایوان کو غیر منظم دیکھ کر ایوان کی کارروائی دو بجے دن تک کے لئے ملتوی کردی۔ ہنگامہ کی وجہ سے توجہ دلاﺅ نوٹس نہیں پڑھی گئی اور اس پر حکومت کا جواب بھی نہیں ہو پایا۔