کورونا: بہار کے ’ہاٹ اسپاٹ‘ سیوان میں ہائی الرٹ، ڈرون سے ہو رہی مانیٹرنگ

بہار میں کورونا انفیکشن کے معاملے دوسری ریاستوں کے مقابلے کم ہیں، لیکن گزشتہ تقریباً 15 دنوں میں ضلع سیوان ریاست میں 'ہاٹ اسپاٹ' کی شکل میں سامنے آیا ہے۔ گزشتہ دو ہفتوں میں یہاں تقریباً ڈھائی درجن لوگ کورونا انفیکشن کے شکار ہو گئے ہیں۔ چونکہ بہار میں سب سے زیادہ کورونا پازیٹو معاملے اسی ضلع سے سامنے آئے ہیں اس لیے مقامی انتظامیہ ہائی الرٹ پر ہے اور سختی کے ساتھ چیزوں کو کنٹرول کرنے کی کوشش کی جا رہی ہے۔

حالات زیادہ خراب نہ ہوں، اس لیے ہر تھانہ کی ناکہ بندی کے علاوہ سیوان، گوپال گنج اور چھپرہ کی سرحدوں پر بھی ناکہ بندی ہو گئی ہے۔ ان سب کے باوجود خبریں موصول ہو رہی ہیں کہ رگھوناتھ پور ڈویژن کے پنجوار گاؤں میں 23 لوگ کورونا وائرس انفیکشن کی زد میں ہیں۔ راجدھانی سے آئی طبی محکمہ کی ٹیم لگاتار یہاں سینیٹائزیشن کا کام کر رہی ہے اور ڈرون کیمرے سے گاؤں کی نگرانی اور مانیٹرنگ بھی ہو رہی ہے۔ لوگوں کو گھر سے نہ نکلنے کی اپیل کی گئی ہے اور ایس ڈی او کے ساتھ ساتھ ایس ڈی پی او بھی خود اناج و سبزی کی فراہمی یقینی بنانے کی کوشش میں لگے ہوئے ہیں۔

میڈیا ذرائع کے مطابق ضلع انتظامیہ نے ضلع کے 10 ڈویژنوں کے 47 گاؤوں میں لاک ڈاؤن پر سختی سے عمل کرنے کا حکم دے دیا ہے۔ ان گاؤوں کو کنٹنمنٹ زون بنا دیا گیا ہے۔ تین کلو میٹر تک کسی کے آنے جانے پر پابندی ہے۔ اس کے ساتھ ہی 7 کلو میٹر کے دائرہ کو بفر زون بھی بنایا گیا ہے۔ سیوان میں شہری علاقے کی اہم سڑکوں سے محلے کی طرف جانے والی سڑکوں کو بانس اور بلّیوں سے بند کر دیا گیا ہے۔

قابل ذکر ہے کہ رگھوناتھ پور ڈویژن کے پنجوار گاؤں میں ایک ہی فیملی کے 21 لوگ کورونا انفیکشن کے شکار ہوئے ہیں۔ بتایا جاتا ہے کہ خاندان کا ایک نوجوان عمان میں کام کرتا تھا۔ واپسی پر اسے ہوم آئسولیشن میں رکھا گیا تھا لیکن اس نے لاپروائی کا مظاہرہ کیا۔ رشتہ داروں کے گھروں میں آنا جانا بھی شروع کر دیا اور دوستوں کے ساتھ کرکٹ بھی کھیلا۔ جب اس میں کورونا کی علامت سامنے آئی تو جانچ کرائی گئی اور جانچ میں 3 اپریل کو اس کے پازیٹو ہونے کی تصدیق ہوئی۔ اس کے بعد اس کی ماں اور بیوی میں بھی کورونا انفیکشن پایا گیا اور دیکھتے ہی دیکھتے خاندان کے 21 ارکان کورونا کی زد میں آ گئے۔ اس کے ساتھ ہی انھوں نے گاؤں کے دو دوسرے لوگوں میں بھی یہ انفیکشن پھیلا دیا۔ دھیرے دھیرے کر کے گاؤں کے دوسرے لوگوں کا بھی سیمپل لیا جا رہا ہے تاکہ پتہ چل سکے کہ انفیکشن کے پھیلاؤ کا دائرہ کتنا وسیع ہے۔ گاؤں کے کئی لوگوں کو الگ الگ مقامات پر آئسولیٹ بھی کیا گیا ہے۔