زیادہ تنخواہ پر پنشن کا نوٹیفکیشن جاری، درخواست دینے کی آخری تاریخ 26 جون

نئی دہلی: محنت اور روزگار کی مرکزی وزارت نے ملازمین کے پروویڈنٹ فنڈ آرگنائزیشن- ای پی ایف او کی ای پی ایس- 95 پنشن اسکیم میں شامل ملازمین کو زیادہ تنخواہ پر پنشن دینے کے بارے میں نوٹیفکیشن جاری کیا ہے۔ وزارت نے منگل کی رات دیر گئے یہاں جاری دو نوٹیفیکیشن میں کہا کہ یہ نوٹیفکیشن 4 نومبر 2022 کو سپریم کورٹ کے فیصلے کے مطابق جاری کیے گئے ہیں۔

ایک نوٹیفکیشن میں کہا گیا ہے کہ زیادہ تنخواہ پر پنشن کے لیے درخواست دینے کی آخری تاریخ 26 جون 2023 ہوگی۔ اس سے ملازمین اور آجروں کو زیادہ اجرت پر پنشن کے لیے درخواست دینے کے لیے وافر وقت دستیاب ہو گا۔ اس سے قبل درخواست داخل کرنے کی آخری تاریخ 3 مئی 2023 اعلان کی گئی تھی۔

ایک اور نوٹیفکیشن میں کہا گیا ہے کہ ای پی ایف اور ایم پی ایکٹ اور سوشل سیکورٹی کوڈ، 2020 کو مدنظر رکھتے ہوئے، پراویڈنٹ فنڈ میں آجروں کے کل 12 فیصد میں سے 1.16 فیصد اضافی حصہ لینے کا فیصلہ کیا گیا ہے۔ یہ شق سپریم کورٹ کی ہدایات کے مطابق ہے۔