اعظم خان کے بیٹے کی اسمبلی سیٹ پر الیکشن کرانے کی ہائی کورٹ کی ہدایت

الہ آباد: الہ آباد ہائی کورٹ نے رام پور کی سوار اسمبلی سیٹ کا الیکشن کرانے کی ہدایت دی ہے۔ یہ سیٹ یہاں کے رکن اسمبلی عبداللہ اعظم کا انتخاب ہائی کورٹ کے ذریعہ منسوخ کئے جانے کی وجہ سے خالی ہوگئی ہے۔ جج ششی کانت گپتا اور جج پنکج بھاٹیا پر مشتمل بنچ نے میونسپل کونسل سوار کے سابق صدر شریف احمد کی طرف سے داخل عرضی پر یہ حکم دیا۔

عرضی گزار کے وکیل وکرانت پانڈے کے مطابق سوار اسمبلی سیٹ کا الیکشن الہ آباد ہائی کو رٹ نے 16دسمبر 2019کو منسوخ کردیا تھا۔ کیونکہ وہاں کے منتخب رکن اسمبلی عبداللہ خان نے پیدائش کے غلط سرٹی فکیٹ کی بنیاد پر لڑا تھا۔ اس وقت اترپردیش کی سات خالی سیٹوں پر ضمنی انتخابات ہورہے ہیں۔

سوار اسمبلی سیٹ پر کوئی نوٹفکیشن جاری نہیں کیا گیا تھا۔ وکیل کا کہنا ہے کہ عوامی نمائندگی قانون کے تحت اسمبلی کی سیٹ چھ مہینہ سے زیادہ خالی نہیں رکھی جاسکتی ہے اس لئے سوار کی سیٹ پر بھی الیکشن کرایا جائے۔ الیکشن کمیشن کی طرف سے اس اعتراض کیا گیا اور ہائی کورٹ کے فیصلے کے خلاف سپریم کورٹ میں اپیل زیرالتوا ہے۔

دوسرے عرضی گزار نے الیکشن کمیشن کو کوئی رپورٹ نہیں دی ہے اس لئے عرضی قابل عمل نہیں ہے۔ عرضی گزار کے وکیل نے اس کی مخالفت کرتے ہوئے کہا کہ سپریم کورٹ کی طرف سے کوئی حکم امتناعی جاری نہیں کیا گیا ہے۔