موسلا دھار بارش سے پٹنہ شہر میں پانی ہی پانی، قانون ساز اسمبلی احاطہ اور وزیروں کے بنگلوں تک پہنچا

بہار کی راجدھانی پٹنہ میں موسلا دھار بارش کے بعد پورا شہر پانی پانی ہوگیا ہے۔ کئی جگہ نالی اور گڈھوں میں بارش کا پانی جمع ہوگیا ہے۔ یہاں تک کہ بہار قانون ساز اسمبلی احاطہ، آس پاس کے کئی وزیروں کے بنگلوں اور پٹنہ کے کئی اسپتالوں میں بھی پانی داخل ہو گیا ہے۔ پٹنہ شہر کی ایسی حالت دیکھ  کراس سلسلے میں حکومت کی تیاریوں پر سوالیہ نشان لگ گیا ہے۔ حالانکہ وزیراعلیٰ نتیش کمار نے فوری طور پر جگہ جگہ جاکر متاثر علاقوں کا معائنہ کیا۔ نیوز ایجنسی کے مطابق نتیش کمار نے پمپ ہاؤس کا جائزہ لیا اور افسران کو یہ یقینی بنانے کی ہدایت دی کہ بارش کے دوران شہر میں پانی کا جماؤ نہیں ہو پائے۔

شہر میں 41.8 ملی میٹر بارش ہوئی جس سے اسٹرینڈ روڈ، راج بنسی نگر، بورنگ روڈ، بیلی روڈ اور پاٹلی پُترا کالونی سمیت زیادہ تر پاش علاقوں اور نچلے علاقوں میں بارش کا پانی بھر گیا، جس کی وجہ سے گاڑیوں کی آمد ورفت میں بہت دقتیں پیش آئیں۔ زیادہ بارش کا اثر بہار قانون ساز اسمبلی احاطہ میں بھی دیکھنے کو ملا جب وہاں بھی پانی نے اپنی دستک دے دی۔ یہی نہیں کچھ دوری پر ہی واقع کئی ریاستی وزراء کے سرکاری بنگلوں میں بھی بارش کا پانی بھر گیا ہے۔

سوشل میڈیا پر شہر بھر میں جگہ جگہ پانی جماؤ کی تصاویر اور ویڈیو آنے کے بعد شہری ترقیات اور رہائش کے وزیر نتن نوین نے ایمرجنسی میٹنگ بلائی اور اس سلسلے میں فوری کارروائی پر غور کیا۔ دفتر کی طرف سے جاری بیان میں کہا گیا ہے کہ وزیر نے تیاریوں اور ریسپانس سسٹم کی کمی پر توجہ دی ہے اور چھٹی پر گئے سبھی سینئر افسران کو فوراً ڈیوٹی جوائن کرنے کے لیے کہا گیا ہے۔ اس درمیان ریاستی حکومت نے پوری ریاست میں ضلع انتظامیہ کے افسران کو مستعد رہنے کی ہدایت دے دی ہے۔ واضح ہو کہ گزشہ دو روز سے پٹنہ سمیت بہار کے کئی علاقوں میں لگاتار بارش ہو رہی ہے جس کی وجہ سی کئی ندیوں کی آبی سطح میں اضافہ ہو گیا ہے۔ گنگا، کوسی، گنڈک، بوڑھی گنڈک، مہانندا اور کملا جیسی ندیوں میں زبردست طغیانی دیکھی گئی ہے۔ پٹنہ، گوپال گنج، مشرقی چمپارن، مغربی چمپارن میں کچھ مقامات پر ندیاں خطرے کے نشان سے اوپر ہیں تو بگہا، سوپول، دربھنگہ، کھگڑیا اور جھنجھار پور میں بھی ندیوں میں آبی سطح بڑھ گیا ہے۔