ایچ ڈی دیوگوڑا نے آئندہ لوک سبھا انتخاب نہ لڑنے کا کیا اعلان، بڑھتی عمر کے سبب لیا یہ فیصلہ

رواں سال لوک سبھا انتخاب ہونے والا ہے اور اس کو لے کر سبھی پارٹیاں پوری طرح سرگرم ہو گئی ہیں۔ قومی اور ریاستی پارٹیاں منصوبہ بندی میں مصروف ہو گئی ہیں اور امیدواروں کے ناموں پر تبادلہ خیال بھی شروع ہو چکا ہے۔ اس درمیان جنتا دل (سیکولر) کی طرف سے ایک بڑی خبر سامنے آ رہی ہے۔ سابق وزیر اعظم اور جے ڈی ایس چیف نے آئندہ لوک سبھا انتخاب نہ لڑنے کا اعلان کر دیا ہے۔

قابل ذکر ہے کہ جنتا دل (سیکولر) کرناٹک میں اپنی اچھی گرفت رکھتی ہے اور آئندہ لوک سبھا انتخاب کے پیش نظر کافی سرگرم بھی ہے۔ پارٹی نے یہ اعلان بھی کر رکھا ہے کہ آئندہ لوک سبھا انتخاب میں وہ بی جے پی کے ساتھ مل کر میدان میں اترے گی۔ یعنی جنتا دل سیکولر این ڈی اے کا حصہ بنے گی۔ ایسے میں لوک سبھا کی کتنی نشستیں اسے حاصل ہوں گی، اس سلسلے میں ابھی کچھ بھی مصدقہ طور پر نہیں کہا جا سکتا۔ لیکن ایچ ڈی دیوگوڑا کا انتخاب نہ لڑنا جنتا دل سیکولر کے لیے ایک بہت بڑا فیصلہ ہے۔

ایچ ڈی دیوگوڑا نے اپنے بیان میں صاف طور پر کہا ہے کہ وہ اپنی عمر کو دیکھتے ہوئے آئندہ لوک سبھا انتخاب نہیں لڑیں گے۔ حالانکہ وہ انتخاب میں امیدواروں کے لیے تشہیر کرتے ہوئے ضرور نظر آئیں گے۔ سابق وزیر اعظم نے ایک پریس کانفرنس میں کہا کہ میں انتخاب نہیں لڑ رہا ہوں۔ میں اب 90 سال کا ہو گیا ہوں۔ ہمیں جو بھی سیٹیں ملیں گی اور جہاں بھی ضروری ہوگا، میں وہاں جاؤں گا۔ میرے پاس بولنے کی طاقت ہے اور یادداشت بھی مضبوط ہے۔ اس کے ساتھ میں انتخابی تشہیر کروں گا۔